شمیم احمدندویؔ
ملت وجماعت کا گنجینۂ گراں مای
ملت وجماعت کا گنجینۂ گراں مایہ۲۹؍اکتوبر۲۰۰۹ء کی رات میں بیرون ملک کے ایک سفر کے سلسلہ میں میراقیام لکھنؤ میں تھا، کہ رات تقریباً دس بجے مولانا عبدالمنان سلفی کا فون آیا جوکہ سفر حج کے سلسلہ میں خودبھی لکھنؤ ہی میں مقیم تھے اورجامعہ سے لکھنؤ تک کا ان کا سفراسی دن میرے ہمراہ ہی ہواتھا، فون پرانھوں نے یہ المناک خبردی کہ ڈاکٹرمقتدیٰ حسن ازہری صاحب نے داعی اجل کو لبیک کہا، اس خبر وحشت اثرسے دل پر غم والم کی عجیب کیفیت طاری ہوئی اورجماعت کے ایک مقتدرعالم دین اورعلم وادب کے گنجینۂ گراں مایہ سے مالامال شخصیت کی ناگہانی وفات دل کو تڑپاگئی، میں نے بیماری اوروفات کی تفصیلات جاننی چاہی توفوری طورپر صرف اتنا معلوم ہواکہ بغرض علاج دلی لے جائے گئے تھے کہ وہیں پر وقت موعود آپہونچا، دورحاضرکی اس عظیم علمی وادبی شخصیت سے جماعت کی محرومی اورملت کے ناقابل تلافی زیاں وخسارہ کا احساس قلب پردیرتک طاری رہا، لیکن کچھ دیر بعد دوبارہ مولانا عبدالمنان سلفی کے ذریعہ ہی اس خبرکی تردید کا فون موصول ہوا اورانھوں نے بتایا کہ وفات کی خبردرست نہیں تھی البتہ دلی میں واقع بتراہاسپٹل میں جہاں ان کا علاج چل رہاتھا وہاں کے ڈاکٹروں نے ہرممکن تدبیر کرنے اورہرطرح کی دوائیں آزمانے کے بعداپنی بے بسی کااظہار کردیا ہے اورمرض میں کوئی افاقہ نہ دیکھ کرشفایابی سے مایوسی ظاہرکردی ہے اورجواب دیتے ہوئے ان کے تیمارداروں کوانھیں گھرلے جانے کی تلقین کردی ہے، چنانچہ ان کے اقرباء ان کو دلی سے واپس لے کرگھرآرہے ہیں، لیکن حالت تشویشناک ہے اورمرض سے صحت یابی کی کوئی امیدباقی نہیں رہی، پھر ۳۰؍اکتوبر کی صبح مولانا عبد المنان سلفی نے یہ اندوہناک خبر دی کہ ازہری صاحب کاکانپورکے قریب انتقال ہوگیا، اس کی تصدیق پھرجامعہ سے آئے ہوئے ایک فون کے ذریعہ بھی ہوگئی جس میں جامعہ کے اساتذہ ۔جن میں ایک بڑی تعداد ان کے تلامذہ اورشاگردوں کی بھی ہے۔ یہ دریافت کرناچاہ رہے تھے کہ جنازہ میں شرکت اوراپنے ہردل عزیز استاد کی آخری رسومات کی ادائیگی میں اپنی موجودگی کی خواہش کو کیوں کرعملی جامہ پہونچاسکتے ہیں، میں نے وہیں سے گاڑی کا انتظام کرکے زیادہ سے زیادہ تعداد میں اساتذہ کے شریک جنازہ ہونے کی ہدایت کردی اورخودسفر پرہونے کی بناپر جنازہ میں شریک نہ ہوسکنے کے لئے دل مسوس کررہ گیا، پتہ یہ چلاتھا کہ رات میں بعدنماز مغرب یاعشاء نمازجنازہ ہوگی جب کہ اسی رات میں قطرکے لئے میری فلائٹ تھی۔
دارالعلوم ندوۃ العلماء لکھنؤ سے اپنی فراغت کے بعداور جامعہ سراج العلوم السلفیہ جھنڈانگر کی مجلس عاملہ کاممبراورنائب ناظم منتخب ہونے کے مختصرعرصہ میں جب میں نے جامعہ کے معاملات میں بعض چھوٹے موٹے کاموں اورخطوط وغیرہ تحریر کرنے کے سلسلہ میں عم محترم خطیب الاسلام مولانا عبدالرؤف رحمانی جھنڈانگری رحمہ اللہ کا ہاتھ بٹانا شروع کیا اسی وقت سے وقتاً فوقتاً ڈاکٹرمقتدیٰ حسن ازہری رحمہ اللہ کانام کانوں میں پڑتا رہا اورغائبانہ طورپر ان کی شخصیت سے تعارف ہوتارہا اورگزرتے وقت کے ساتھ ان کے متعلق واقفیت بڑھتی رہی، پھرجب ہمارے جامعہ نے جامعہ سلفیہ کے بعض فارغین کی تدریسی ودعوتی خدمات حاصل کیں توان میں موصوف مرحوم کے بعض ہونہار شاگرد بھی تھے جواپنی علمی وادبی صلاحیتوں کی وجہ سے جامعہ میں ممتاز تھے، تو ان کے ذریعہ بھی ازہری صاحب کی مورخانہ بصیرت اورادبی صلاحیت کاتذکرہ کبھی کبھی سنتارہا، لیکن ان کا مکمل تعارف اوران کی شخصیت کے مختلف گوشے اس وقت میرے سامنے نمایاں ہوکرآئے جب جامعہ کی مکمل ذمہ داری مجھ ناتواں کے کندھوں پرآگئی، اس مرحلہ میں ان سے خط وکتابت بھی رہی اورٹیلی فونی رابطہ بھی اور انھوں نے جامعہ کو رواں دواں رکھنے ،خطیب الاسلام رحمہ اللہ کے خون جگرسے سیراب کردہ پودے کی آبیاری کرنے اوران کی یادگاروں کوباقی رکھنے کے سلسلہ میں کچھ مفید مشورے بھی دئے اور ان کی سوانح حیات کتابی شکل میں شائع کرنے کا گراں قدرمشورہ بھی دیا اوراپنے قلبی تعلق اوردلی لگاؤ کابے تابانہ اظہاربھی کیا، یہ چیزیں غائبانہ طورپرجاری رہیں لیکن ملاقات اوربالمشافہ گفتگو کے لئے کوئی موقع نہ مل سکا، اس عرصہ میں میں نے جامعہ کے بعض پروگراموں میں ان کوشرکت کی دعوت بھی دی لیکن وہ اپنی عدیم الفرصتی سے زیادہ غیر معمولی احتیاط پسندی کی بناپرنیپال آنے سے ہچکچاتے رہے اورہمیشہ تذبذب کاشکاررہے اوراس دوران نیپال کے سیاسی حالات بھی ماؤنوازوں کی دہشت گردانہ سرگرمیوں کی بناپرکافی دگرگوں اورابترتھے، لوگوں کی جان ومال اورعزت وآبرو کاکوئی محافظ نہیں تھا، ملکی حالات بہت ہی مخدوش اورتشویشناک ہوچکے تھے اورہندوستانی اخبارات میں بھی یہاں کے حالات موضوع بحث تھے، اس لئے اس دوران محتاط لوگ ویسے بھی یہاں کا سفر کرتے ہوئے گھبراتے تھے، بہرحال ہم نے ان کو دعوت تودی لیکن غیریقینی حالات کے پیش نظراس پرزیادہ اصرارکرنا مناسب نہ سمجھا اس طرح میں عرصہ تک اس عدیم المثال علمی وادبی شخصیت کی زیارت اوران کے علم وفضل سے استفادہ کرنے سے محروم رہا۔
مئی ۲۰۰۷ء ؁ میں جامعہ سلفیہ بنارس میں’’نواب صدیق حسن خاں: حیات وخدمات‘‘کے موضوع پرایک سمینار کا انعقاد ہوا اس میں جماعت کے مقتدرعلماء کے ساتھ مجھ ناچیز کوبھی شرکت کادعوت نامہ ملا اوراس کی سعادت حاصل ہوئی، میں دیگر مہمانوں کے ساتھ جامعہ کے مہمان خانہ میں مقیم تھا کہ مہمانوں سے ملاقات کے لئے ڈاکٹر مقتدیٰ حسن ازہری صاحب تشریف لائے ،میں نے دیکھاکہ شیروانی میں ملبوس ایک وجیہ وبارعب شخصیت ہال میں داخل ہوئی، وقارو تمکنت کاپیکر،علمی وجاہت سے معمور، آنکھوں میں ذہانت کی چمک اورپیشانی پرعلوم نبوت کا نور، ظاہری وضع قطع عالمانہ اورگفتگو فاضلانہ لیکن انداز فقیرانہ اورچال ڈھال سے تواضع وخاکساری کااظہار یہ سارے اوصاف بحیثیت مجموعی ان کو اوروں سے ممتاز بنارہے تھے، انھوں نے سب کے پاس تھوڑی تھوڑی دیررک کرخیریت دریافت کی اوران کو دیکھ کرلوگ احتراماً کھڑے ہوگئے، میرا تعارف ان سے صرف غائبانہ تھا میں ان کی صورت سے آشنانہ تھا ،چنانچہ میں نے غیرمعمولی طورسے ان کے احترام وتوقیر کودیکھتے ہوئے اپنے ساتھ کھڑے ہوئے مولانا عبدالمنان سلفی سے بہت آہستگی سے دریافت کیا کہ یہ کون صاحب ہیں؟ توانھوں نے اتنی ہی خاموشی سے جواب دیا کہ ازہری صاحب یہی ہیں، پھر وہ ہماری طرف بڑھے توانھوں نے دوطرفہ تعارف کا باقاعدہ فریضہ اداکیا، یہی میری ان سے پہلی ملاقات تھی، کچھ وقفہ کے بعدجامعہ سلفیہ بنارس کے وسیع وعریض ہال میں پروگرام شروع ہوا توان کے علمی جوہر نمایاں ہوئے اور انھوں نے نہایت ہی شستہ زبان میں نہ صرف پروگرام کی غرض وغایت اوراس کی اہمیت وافادیت پرروشنی ڈالی بلکہ نواب صدیق حسن خاں کی زندگی کے بعض گوشوں اوران کے کارہائے نمایاں پراور ان کی علمی خدمات پرنہایت ہی فاضلانہ تقریرکی، اوراپنے مقالہ کے اقتباسات پیش کئے، اس سے ان کے مطالعہ کی گہرائی اورمتعلقہ موضوع پر معلومات کی وسعت کاخوب خوب اندازہ ہوا، اپنے بلیغ انداز بیاں اوروقیع معلومات کے دریابہانے کی بناپر وہ ہال میں موجود سامعین کی توجہ کا مرکز بنے رہے اورپروگرام کی کامیابی میں ان کا کردارنمایاں رہا۔
گذشتہ سال اکتوبر کے مہینہ میں مرکزی جمعیت اہل حدیث ہند نے ملک کی راجدھانی دہلی میں ایک عظیم الشان تاریخی کانفرنس منعقد کرنے کافخر واعزاز حاصل کیا، اس کانفرنس کے لئے جب اعلانات وتیاریوں کاآغاز ہوا توصدراستقبالیہ کے لئے ذمہ داران جمعیت کی نظرانتخاب ڈاکٹرمقتدیٰ حسن ازہری رحمہ اللہ پرہی پڑی، کیونکہ جماعت میں ان سے زیادہ ذی علم اورمعتبر ومستند شخصیت کوئی اورنظرنہیں آتی تھی اوراس منصب کاحق اداکرنے اوراس کے ساتھ پوری طرح انصاف کرنے کے لئے کوئی اورشخص موزوں نہ معلوم ہوا جوجمعیت کی پوری تاریخ سے واقفیت بھی رکھتا ہو اورجماعت کی تعمیر وترقی سے دلچسپی بھی، ملت کا دردبھی اس کے سینہ میں پنہاں ہواورملت وجماعت کا رمز شناس بھی ہو، ساتھ ہی ملک میں موجود متوازی تحریکات ونظریات کے فوائد ونقصانات پربھی اس کی گہری نظرہو اورجو مورخانہ بصیرت سے مالامال اورعلم وعرفان کی بلندیوں پرفائز ہو، انھوں نے اس منصب وذمہ داری کو شرح صدرسے قبول کیا، اجلاس کو کامیابی سے ہمکنار کرنے کے لئے اپنے اوقات کو فارغ کیا اورایک بلیغ ووقیع اورپراز معلومات خطبہ استقبالیہ تحریر کیا، میری ان سے دوسری ملاقات جوشومئی قسمت سے آخری بھی ثابت ہوئی، اسی اسٹیج پرہوئی، وہاں انھوں نے اپنے طویل خطبۂ استقبالیہ کے اقتباسات پیش کئے جس میں جمعیت وجماعت کی پوری تاریخ اوراس کے نشیب وفراز اورسردوگرم کردار کو کہیں اختصار اورکہیں شرح وبسط سے پیش کیا، چنانچہ جمعیت وجماعت کی تاریخ جب بھی مستقبل کا منصف مورخ لکھے گا توان کاتذکرہ کئے بغیر یہ تاریخ نہ مکمل رہے گی، جس طرح مرکزی جمعیت اہل حدیث جوماضی میں آل انڈیا اہل حدیث کانفرنس کے نام سے جانی جاتی تھی، ملک کی آزادی کے بعدنشاۃ ثانیہ کا ذکرہوگا تونوگڈھ کانفرنس کے بغیر یہ ذکرمکمل نہیں ہوسکتا اورجب نوگڈھ کانفرنس کا تذکرہ ہوگا توخطیب الاسلام علامہ عبدالرؤف رحمانی رحمہ اللہ کے تاریخی خطبۂ استقبالیہ کے بغیر اورمولانا عبدالجلیل رحمانی کے اخلاص اور بے مثال لگن اورجدوجہد کے بغیر یہ تذکرہ ادھورا ہوگا۔
اسی طرح جماعت اہل حدیث نے آزادی ہند کے بعدجن نابغہ روزگار اورعبقری شخصیات کوپیداکیا ان کا جب تذکرہ ہوگا تو ڈاکٹرمقتدیٰ حسن ازہری کو اس میں نمایاں مقام حاصل ہوگا کیونکہ کم ہی شخصیات ایسی ہوتی ہیں جوبیک وقت کئی طرح کی صلاحیتوں اورمختلف طرح کی خوبیوں سے مالا مال ہوں، وہ انھیں نادرالوجود شخصیات میں شامل تھے جوبیک وقت داعی ومبلغ، مایہ ناز خطیب، ماہرقلمکار ومصنف، حالات حاضرہ سے واقف صحافی ،سیال قلم کامالک، سیاسی مسائل کا ناقدومبصر، اخاذ ذہن ودماغ کاحامل، وسیع مطالعہ سے مالا مال، قوت حافظہ وقوت استحضار سے بہرہ ور، تجربہ کارمدرس ومربی بلکہ مسند درس کی رونقیں جس کے دم سے آباد اوراسٹیج کی رونقیں جس کے دم سے معمورہوں، اسی طرح عربی زبان وادب کی باریکیوں سے واقف اوراردوزبان پرمکمل عبور، دونوں زبانوں کا ماہرانشاء پرداز اورعربی زبان کا صاحب طرز ادیب، فکروفن کی بلندیوں پرفائز اوربحرحدیث کا شناور غرض کہ ایسی لازوال خوبیوں کی مالک شخصیت جس پرکسی بھی قوم کو بجاطورپر نازہوسکتا ہے۔
مشرقی یوپی میں مؤ واعظم گڈھ ایسے مردم خیز اضلاع ہیں جنھیں کئی مایہ ناز شخصیات کا مولدومسکن ہونے کا اعزاز حاصل ہے، انھیں میں ڈاکٹرمقتدیٰ حسن ازہری کا اسم گرامی بھی شامل ہے اوروہیں جماعت اہل حدیث کے تین بڑے ومعروف ادارے ہیں، جب کہ کئی دیگر چھوٹے وپرائمری ادارے ودینی مکاتب ہیں ،ڈاکٹر صاحب مرحوم نے ان تینو ں اداروں سے کسب فیض کیا، جامعہ عالیہ عربیہ سے ابتدائی دینی تعلیم حاصل کی، جب کہ اس سے قبل دارالعلوم جومرزاہادی پورہ میں واقع ہے وہیں سے تعلیم کا آغاز بھی ہوگیا تھا اورحفظ کی تکمیل بھی وہیں سے کی، جامعہ عالیہ عربیہ کے بعدمؤ کے معروف دینی ادارہ جامعہ اسلامیہ فیض عام میں داخل ہوئے ،جہاں گرچہ عالمیت تک کی تعلیم ہوتی ہے اوراس کے فارغین کو فیضی کہاجاتاہے وہاں عربی زبان وادب اور مروجہ علوم اسلامیہ حدیث وفقہ اورتفسیر وغیرہ میں بڑی حد تک رسوخ وکمال حاصل کیا، لیکن یہاں ان کی تعلیم ثانویہ کے بعد منقطع ہوگئی اورفراغت کی سند انھوں نے یہاں سے نہیں حاصل کیا، بلکہ اس کے لئے انھوں نے مؤ کے تیسرے بڑے ادارہ جامعہ اثریہ دارالحدیث کارخ کیا اوراپنی عالمیت تک کی تعلیم مکمل کرکے سند فراغت یہیں سے حاصل کی، اس طرح مؤ کے تینوں اداروں کے ماہرین فن اورمعروف اساتذہ سے اکتساب فیض کیا اوران کے دروس سے بھرپور فائدہ اٹھایا، جامعہ اثریہ دارالحدیث میں تعلیم کے دوران ہی انھوں نے یوپی بورڈ سے مولوی.عالم اورفاضل کی اسناد بھی حاصل کیں، ان کے ذہن رسا کی منزل صرف عالمیت کی سند نہ تھی بلکہ حصول علم کی حرص وطمع نے ان کو حدپرواز سے آگے جانے کا حوصلہ عطاکررکھا تھا، اس لئے وہ کسی ایک سند پر قانع نہ ہوسکتے تھے، چنانچہ جہاں انھوں نے عالمیت کی سند جامعہ اثریہ دارالحدیث سے حاصل کی وہیں مروجہ سرکاری اسناد میں اعلیٰ ترین سندوں سے اپنی صلاحیت اورعلم وفضل میں چار چاند لگائے، ان کی علمی منزل یہاں بھی نہ تھی بلکہ ان اسناد کی حیثیت توصرف ایک مستقر کی تھی ، جہاں وہ تھوڑی دیرتک سستانے کے لئے رکے اوراس استراحت کے دوران درس وتدریس کا سلسلہ بھی جاری رہا لیکن آپ کی منزل مقصود آپ کو مزید بادیہ پیمائی کے لئے آوازدے رہی تھی، جس کو انھوں نے یہ کہتے ہوئے لبیک کہا ؂
مل ہی جائے گی کبھی منزل لیلیٰ اقبال
کوئی دن اورابھی بادیہ پیمائی کر
چنانچہ ۱۹۶۳ء ؁ میں دنیا کی قدیم ترین اسلامی یونیورسٹی جامعہ ازہر مصرکے تعلیمی وظیفہ پرآپ سوئے ازہر روانہ ہوئے، وہاں آپ نے فیکلٹی آف اصول الدین میں داخلہ لے کروہاں سے M.A.کی باوقار سند حاصل کی، پھریہیں سےP.H.D.کے لئے رجسٹریشن کرایا اور ساتھ ہی دوسال تک قاہرہ ریڈیو کی اردوسروس میں مترجم واناؤنسر کے فرائض بھی انجام دئے، لیکن کچھ وطنی حالات سے مجبورہوکر یاکسی اوروجہ سے پی.ایچ.ڈی. کی تکمیل وہاں سے ممکن نہ ہوئی، وطن واپسی ہوئی لیکن قدرت کو یہ منظور نہ تھا کہ علم وادب کے اس مایہ ناز سپوت کا طویل علمی سفریہیں پایہ اختتام کو پہونچے ،اسناد سے ان کا کمرہ ضرور آراستہ ہوگیا تھا جس میں حفظ، منشی، مولوی، عالم، فاضل، عالمیت اورایم.اے. کی اسناد شامل تھیں اور یہ اسناد آپ کے دستار فضیلت میں جگمگارہی تھیں، لیکن طلب علم کی پیاس ابھی بھی نہیں بجھی تھی، ۱۹۶۷ء ؁ میں ہندوستان واپس ہونے کے بعدجامعہ سلفیہ بنارس میں مسند درس پر رونق افروز ہوئے ساتھ ہی تحقیق وتصنیف کا سلسلہ بھی شروع کیا، اس وقت علمی دنیا میں ان کی شہرت ہوچکی تھی اوران کی آراء کو قدرکی نگاہ سے دیکھاجانے لگاتھا ،فکروفن کی دنیا میں ایک مفکر ودانشور کی حیثیت سے بھی ان کا چرچا ہونے لگاتھا، لیکن پھربھی افتا وطبع نے علم کے میدان میں قناعت کا سبق نہیں سیکھاتھا، ابھی انھیں اس میدان میں اورہفت خواں سرکرنے تھے، چنانچہ مزید حصول علم کے لئے اورملک کی مایہ ناز اسلامی یونیورسٹی علی گڈھ مسلم یونیورسٹی کے ناموراساتذہ سے اکتساب فیض کرکے اپنی علمی صلاحیتوں کومزید نکھارنا تھا اوراپنی اسناد کی فہرست میں کچھ اور وزن دار اورباوقار ڈگریوں کااضافہ کرناتھا، اس مقصدکے حصول کے لئے پھر ۱۹۷۲ء ؁ میں علی گڈھ کا رخ کیا اوروہاں سے ایم.فل. کی ڈگری حاصل کی پھراس سے تین سال بعد وہیں سے ادب عربی میں پی.ایچ.ڈی. کیا ،واپس پھرجامعہ سلفیہ کارخ کیا، وہاں پر ان کو ہاتھوں ہاتھ لیاگیا اوران کی غیرمعمولی پذیرائی ہوئی، اس سے قبل انھیں ۱۹۶۹ء ؁ ہی میں جب جامعہ سلفیہ بنارس سے ایک عربی مجلہ’’صوت الامۃ‘‘ نکالنے کافیصلہ کیاگیا تھا تواس کا مدیرمسؤل بنایا گیا تھا، کیونکہ جامعہ سلفیہ کے ذمہ داران کو اس عربی مجلہ کو ملک وبیرون ملک اور بلاد عربیہ میں مقبول بنانے کے لئے اس سے بہتر اور معتبرنام نہیں مل سکتا تھا، انھوں نے اپنی خداد اد علمی وادبی صلاحیتوں سے مجلہ کودنیائے علم وادب میں روشناس کرایا اوراس کی مقبولیت کوچارچاند لگائے۔
جامعہ سلفیہ کے سابق ناظم اعلیٰ مولانا عبدالوحید سلفی رحمہ اللہ نے ایک ماہر وکامیاب جوہری کی طرح اس نایاب ہیراکی قدروقیمت کابروقت اندازہ کرلیاتھا لہذا ۱۹۸۷ء ؁ میں ان کو جامعہ کا ریکٹر بنادیاگیا، انھوں نے اپنے اس منصب سے جامعہ کو بہت فائدہ پہونچایا اورملک وبیرون ملک اس کے تعارف کوبہت وسیع کیا اوراس کی نیک نامی وشہرت میں گراں قدراضافہ کیا، ان کو بھی جامعہ سے جولگاؤ تھا اس کوناپنے کے لئے ابھی تک کوئی پیمانہ نہیں بناہے، عمرعزیز کا ایک بڑا حصہ انھوں نے جامعہ سلفیہ کی خدمت میں صرف کیا، جامعہ کے شعبہ نشرواشاعت ۔ جہاں سے سینکڑوں اہم کتابیں شائع ہوچکی ہیں ۔ کے بھی نگران اعلیٰ بنائے گئے اوراس طرح اپنے وقت کا ایک ایک لمحہ جامعہ سلفیہ کی خدمت اوراس کی تعمیر وترقی میں صرف کیا، فاضل وقت کو کتابوں کی تصنیف وتالیف ،ترجمہ وتبییض،کتابوں کے مقدمات تحریرکرنے اور’’صوت الامۃ‘‘ کا افتتاحیہ لکھنے میں صرف کیا، اس طرح ان کا وقت بہت ہی مصروف اورعلمی مشاغل سے معمور گذرا۔
اللہ تعالیٰ نے ان کے وقت میں بھی بہت برکت عطاکی تھی اورہمت وحوصلہ اورجوش وولولہ سے بھی نوازاتھا، کسی بڑے سے بڑے علمی کام سے وہ نہیں گھبرائے ،نہ ہی ذمہ داریوں کے قبول کرنے سے ہراساں ہوئے اورنہ ہی نامساعد حالات سے دل شکستہ وحواس باختہ ہوئے، غرض کہ ایسی شخصیات کسی بھی قوم وجماعت کا قابل فخر سرمایہ ہوسکتی ہیں اورصدیوں میں کبھی کبھی پیداہوتی ہیں اورایسی بے نظیر صلاحیتوں کی حامل لوگوں کے لئے ہم بجاطورپر کہہ سکتے ہیں ؂

اولئک آبائی فجئنی بمثلھم
اذا جمعتنا یاجریر المجامع

مولانا عبدالحنان فیضیؔ ؍حفظہ اللہ
مفتی و شیخ الحدیث جامعہ سراج العلوم السلفیہ،جھنڈانگر
ڈاکٹرازہریؔ ۔۔۔چند یادیں


جو بادہ کش تھے پُرانے وہ اٹھتے جاتے ہیں
کہیں سے آبِ بقاء دوام لا ساقی!
بخاری شریف ’’کتاب العلم‘‘ میں قیامت کی علامات میں سے ایک علامت یہ ذکرکی گئی ہے کہ آخری زمانہ میں علوم دین ختم ہوجائیں گے اورجہالت کا دوردورہ ہوگا ،کتا ب العلم ہی میں ایک باب’’کیف یقبض العلم‘‘قائم کرکے امام بخاری رحمہ اللہ نے واضح کیا ہے کہ علم دین ختم ہونے کی کیا صورت ہوگی اور اس سلسلہ میں حضرت عبداللہ بن عمروبن العاص رضی اللہ عنہ کی وہ حدیث ذکرکی ہے جس میں بیان کیاگیا ہے کہ ’’علم دین کا اٹھایا جانا علماء دین کی وفات کے ذریعہ ہوگا ‘‘،اسی نظام کے تحت عرب وعجم کے بہت سارے ائمہ محدثین، فقہاء مجتہدین اور علماء کبار موت کے آغوش میں چلے گئے اورجاتے رہتے ہیں اورآئندہ بھی یہ سلسلہ تاقیامت قائم رہے گا، ڈاکٹر مقتدیٰ حسن ازہری رحمہ اللہ کا سانحۂ ارتحال بھی اسی سلسلہ کی ایک کڑی ہے، ڈاکٹرصاحب کی وفات کا حادثہ بلاشبہ ملک وملت اور جماعت کے لئے باعث رنج وغم توہے ہی مگر آپ کی جدائی سے جامعہ سلفیہ کو ناقابل تلافی خسارہ پہونچا ہے، اللہ تعالیٰ اپنے فضل وکرم سے ان کا نعم البدل عطافرمائے اورڈاکٹرصاحب کوجنت الفردوس میں جگہ دے کر ان کی دینی وملی اورجماعتی خدمات کو قبول فرمائے اوران کی بشری کوتاہیوں سے درگذرکرے ۔(آمین)
مرحوم کا تعلق شہر مؤ ناتھ بھنجن سے تھا جو کچھ برسوں پیشتر تک ضلع اعظم گڈھ کے زیرانتظام تھا ، اعظم گڈھ متعدد خصوصیات و امتیازات کے ساتھ ساتھ بڑامردم خیزواقع ہواہے، اس کی سرزمین سے بڑے بڑے اور نامورعلماء وفضلاء، محدث ومفسر، صحافی ومؤرخ ،ادیب وشاعر اورمدرس ومربی پیداہوئے جن کی علمی،دعوتی اوراصلاحی خدمات کے اثرات ہمیشہ محسوس کئے جاتے رہیں گے ،ان عبقری شخصیتوں میں مولانا محمد عبدالرحمن محدث مبارکپوری ،شیخ الحدیث مولاناعبیداللہ رحمانی مبارکپوری اورمولانا شبلی نعمانی وغیرہ کا نام بہ طور مثال لیا جاسکتا ہے، اورخاص وہ شہر’’ مؤ‘‘ جہاں ہمارے ممدوح ڈاکٹر ازہری رحمہ اللہ کی ولادت ہوئی اس کی خاک سے مولانا ابوالمکارم،مولانا محمداحمد ،مولانا عبدالعلی ،مولانا عصمت اللہ رحمانیؔ ، مولانا عبداللہ صاحب شائق،مولانا مفتی عبدالعزیز ،مولانا مفتی حبیب الرحمن،مولانا فیض الرحمن اور اردوکے نامورشاعر فضا ابن فیضی جیسی عبقری شخصیتیں پیدا ہوئیں جنھوں نے علوم وفنون کی بے مثال خدمات انجام دیں، اللہ تعالیٰ ان سب پررحم فرمائے اوران کی قبروں کو نورے سے بھردے۔(آمین)
ڈاکٹرصاحب رحمہ اللہ کی تعلیم کاآغاز انھیں کے محلہ ڈومن پورہ سے ہوا،جہاں بہت سارے اکابر علماء پیداہوئے ،ڈاکٹرصاحب رحمہ اللہ نے سب سے پہلے حفظ کلام اللہ کا شرف حاصل کیااوراس کی برکت سے مختلف علوم وفنون میں عروج وارتقاء کے منازل نہایت برق رفتاری سے طے کرتے ہوئے علم و فضل کے بلند وبالامقام پرپہونچ گئے، اورقلیل مدت میں تصنیف وتالیف، تدریس وتربیت اور بحث وتحقیق میں یکتائے روزگار ہوگئے، خودکئی اہم علمی ،ادبی اوراصلاحی کتابیں لکھیں عربی واردوکی متعدداہم کتابوں کے ترجمے کئے،تقریباً چالیس برسوں تک عربی واردومیں مسلسل مضامین لکھتے رہے اورساتھ ہی سیکڑوں کتابوں پر مقدمات وتقریظات تحریرفرمائے، اکابراہل علم موصوف سے اپنی کتاب کامقدمہ لکھانے میں فخرمحسوس کرتے تھے اورموصوف بھی ایسے علماء کی خواہشات پوری کرنے میں کسی حیل و حجت سے کام نہ لیتے تھے۔
میں ڈاکٹر ازہری رحمہ اللہ کوزمانہ طالب علمی سے جانتاہوں، جس زمانہ میں راقم مدرسہ فیض عام مؤ میں زیرتعلیم تھا ازہری صاحب بھی اس وقت وہیں طالب علمی کی زندگی گذاررہے تھے اورمجھ سے جونیئر تھے، ان دنوں مؤطلبہ کا مرجع اور علماء کا مرکزتھا، مولاناعبداللہ شائق، شیخ الحدیث مولانا شمس الحق سلفی، مولانامصلح الدین اعظمی، مولانا عبدالمعیدبنارسی،مولانا محمداحمد مؤی، مفتی حبیب الرحمن رحمہم اللہ جیسے نامور مدرسین وہاں موجودتھے اورپورے آب وتاب کے ساتھ علم کی روشنی بکھیررہے تھے۔
میرے فیض عام کے رفقاء درس میں مولانا مظہرحسن ازہری،مولانا امان اللہ فیضیؔ ( بہار) ، مولانا ابو مظہر اور مولانا ابوالمظفر وغیرہم قابل ذکر ہیں، جب کہ معاصرین میں مولانا عبد الرحمن مبارکپوری حفظہ اللہ مولانا صفی الرحمن مبارکپوری رحمہ اللہ ، شیخ محمد عطاء الرحمٰن مدنیؔ ،مولانا عبد الحمید رحمانیؔ اورڈاکٹرحافظ عبدالعلی مؤی وغیرہم لائق ذکرہیں، ان میں مولانا عبد الرحمن مبارکپوری کے سوا سب مجھ سے جونیئر تھے بلکہ مؤخر الذکر دونوں قابل قدر شخصیات مجھ سے کئی جماعت نیچے کی جماعتوں میں پڑھتے تھے، اس زمانہ میں ذہین، باذوق اورمتفوق طلبہ ہندوستان میں مدرسوں سے فراغت کے بعد مزید علمی تشنگی بجھانے کے لئے جامعہ ازہر مصرکارخ کرتے تھے، میرے بعض ساتھیوں اور معاصروں نے بھی ازہرجانے کا منصوبہ بنایا، مگرجن خوش بختوں کی قسمت نے یاوری کی اورجوازہرگئے وہ تینوں ہی اتفاق سے مؤ کی سرزمین سے تعلق رکھتے تھے(۱)ڈاکٹرمقتدی حسن ازہری رحمہ اللہ(۲) مولانامظہرحسن ازہری(۳)ڈاکٹر حافظ عبدالعلی ؍ حفظہما اللہ، میرے دل میں بھی حصول علم کا شوق تھا اورازہرجانے کی خواہش رکھتا تھا مگرزادِراہ میسرنہ ہونے کے سبب میری یہ آرزوپوری نہ ہوسکی، باقی میرے ان تینوں معاصر رفقاء کواللہ نے موقعہ دیا اورانھوں نے ازہر پہونچ کر اپنی صلاحیتوں کوچارچاند لگایا اورپھر علمی میدان میں نمایاں خدمات انجام دیں۔
ہمارے ممدوح ڈاکٹرازہری رحمہ اللہ جامعہ ازہرسے جب واپس وطن آئے توجامعہ سلفیہ بنارس کے بالغ نظر اورمردم شناس ناظم مولاناعبدالوحید سلفی رحمہ اللہ نے آپ کی خدمات حاصل کرنے میں کامیابی حاصل کی اور علمی، تدریسی، دعوتی، قلمی اورانتظامی صلاحیتوں کوپوری آزادی کے ساتھ اجاگر کرنے کے لئے انھوں ڈاکٹر صاحب کوجامعہ سلفیہ کا وقیع پلیٹ فارم دیا اورمحترم ازہری صاحب ناظم مرحوم کی آرزؤں کے مطابق جامعہ کی خدمت میں لگ گئے اور آخری سانس تک جامعہ کی متنوع خدمت انجام دیتے رہے۔
جس وقت ڈاکٹر مقتدی حسن ازہری جامعہ سلفیہ تشریف لائے وہ جامعہ کا بالکل ابتدائی دور تھا، ابھی اس کے قیام پرچند برس ہی گذرے تھے، علم و ادب کے اس گلشن کو ایک ہونہار ،جفاکش اور مخلص مالی کی ضرورت تھی اور اللہ نے اس کا انتظام ازہری صاحب کی شکل میں کرادیا،بلا شبہ جامعہ سلفیہ بنارس کوان کی تشریف آوری سے ایک نئی زندگی ملی اوراس کے عروج وترقی میں غیرمعمولی اضافہ ہوا ،موصوف نے عرب وعجم کے اندر جامعہ سلفیہ کومتعارف کرانے میں انتہائی نمایاں کرداراداکیا، عرب وعجم کی بہت ساری کانفرنسوں اورعلمی مجالس میں تشریف لے جاکر جامعہ کے شایانِ شان نمائندگی فرمائی،اور اس کے علمی شعبہ’’ادارۃ البحوث العلمیۃ‘‘ کی سرپرستی فرماکر اور عربی،اردب،انگریزی اور ہندی زبانوں میں سیکڑوں علمی،دعوتی اور تحقیقی کتابوں کی اشاعت کراکے جامعہ کے علمی وقار میں اضافہ کیا، اوریہ حقیقت ہے کہ جامعہ سلفیہ کو بام عروج تک لے جانے میں محترم ازہری صاحب کارول بڑااہم رہا ہے اور ان کے احسانات سے جامعہ کبھی بھی سبکدوش نہیں ہوسکتا۔
جامعہ سلفیہ میں چارسالہ قیام اوروہاں تدریسی فریضہ انجام دینے کے دوران ڈاکٹرصاحب رحمہ اللہ نے مجھ ناچیز کو اپنی عظیم عنایتوں اوراحسانوں سے نوازا جس کا میں صدق دل سے معترف ہوں اورآئندہ بھی تاحیات معترف واحسان مندرہوں گا اوران احسانات وعنایات کاشکریہ دعاکے ذریعہ کرتارہتاہوں ، غالبا ۱۹۷۳ ء کی بات ہوگی جب جامعہ سلفیہ بنارس نے تدریسی خدمت انجام دینے کیلئے مجھے اپنے یہاں آنے کی دعوت دی، جامعہ سراج العلوم جھنڈانگر کے ناظم اور میرے مشفق استاد خطیب الاسلام علامہ عبد الرؤف رحمانی رحمہ اللہ نے ایثار کرکے مجھے وہاں جانے کی اجازت اس شرط کے ساتھ دی کہ جب بھی بنارس سے آپ واپس ہوں گے تو جامعہ سرا ج ا لعلوم میں ہی آنا ہوگا، بہر حال میں جامعہ سلفیہ بنارس گیا مگر وہاں کی آب و ہوا مجھے راس نہ آسکی،بلڈ پریشر کاعارضہ لاحق ہوگیا اور جسم میں فیلیا کااثر بھی ظاہر ہوا اور بالآخر چار سال کے بعد مجھے بنارس سے جھنڈانگر واپس آنا پڑا،جامعہ سلفیہ میں چار سالہ قیام کے دوران ڈاکٹر صاحب ہمہ وقت میری ہمت افزائی کرتے اور میرا حوصلہ بڑھاتے رہتے ، چنانچہ تفسیر بیضاوی اور منطق کی قدرے مشکل کتاب قطبی پڑھانے کے لئے اساتذہ جلدی تیار نہ ہوتے تھے، ازہری صاحب نے میرا نام لیا ،میں پرانے مدرسین جن میں کئی ایک میرے استادبھی تھے ان کے سامنے ان کتابوں کے پڑھانے کی حامی کیسے بھرتا لیکن ازہری صاحب نے پورے اعتماد اور وثوق سے جب یہ کہا کہ’’ کیا آپ وہی عبد الحنان نہیں ہیں جو فیض عام میں تھے‘‘ تو ان کی اس بات سے مجھے قوت ملی اور ان کتابوں کی تدریس اپنے ذمہ لی اور تفسیر بیضاوی چاروں سال پڑھاتا رہا اور پھر جب جامعہ سراج العلوم واپس آیا تو تقریبا بائیس چوبیس سال تک اسے پڑھاتا رہا، تین چار سال قبل جب تفسیر بیضاوی نصاب سے خارج کی گئی تو اس کی تدریس کا سلسلہ موقوف ہوا۔
جامعہ سلفیہ میں علالت کے دوران ڈاکٹر صاحب میری ہرطرح سے ہمہ وقت ہمت افزائی فرماتے اوربرابر مجھے تسلی ودلاسہ دیتے، کبھی کبھار کلاس میں آجاتے اورفرماتے تھوڑا پڑھایئے، زیادہ محنت نہ کیجئے، اگرمشکل معلوم ہوتوکلاس ہی میں نہ آیئے،ایک بارکسی امتحان کے بعد چھٹی ہورہی تھی، جامعہ کے ذمہ داران نے اساتذہ پر پابندی عائد کررکھی تھی کہ کوئی بھی استادامتحانی کاپیاں چیک کئے بغیر گھر نہ جائیں گے، اس فیصلہ سے مجھے سخت الجھن تھی ، میں اپنی علالت کے سبب جلد از جلد گھر اپنے بچوں میں پہونچنا چاہتا تھا،اس کی خبر ازہری صاحب کو ہوئی، انھوں نے کہا کہ اپنی ساری کاپیاں مجھے دیجئے اور آپ اطمینان سے گھر جائیے، چنانچہ میرے اس محسن نے سیکڑوں کی تعداد میں میری امتحانی کاپیاں چیک کیں، اللہ تعالیٰ انھیں جزائے خیر دے، اہل علم کی قدر دانی،ہمت افزائی اور ان کی معاونت درحقیقت ازہری صاحب کی زندگی کا ایک نمایاں باب ہے۔
ڈاکٹرازہری کے خسراورحضرت مولانا محمدصاحب حفظہ اللہ کے والدمحترم مولانا عبدالعلی رحمہ اللہ چھ سال تک میرے ممتحن رہے ہیں، جماعت ثالثہ سے ثامنہ تک میراامتحان لیتے رہے،موصوف انتہائی باصلاحیت اورلائق وفائق استاذاورجامع العلوم والفنون تھے ،مولانا محمد صاحب بھی اکابرعلماء اہل حدیث میں سے ہیں اورخوشی ہے کہ ان کے فرزندگرامی مولانااسعد اعظمی بھی علم وتحقیق کے میدان میں نمایاں مقام حاصل کرچکے ہیں اور جامعہ سلفیہ میں اپنے ماموں ازہری صاحب کے کاموں کو دیکھ رہے ہیں۔
یہ چندتاثرات تھے جوبہ مشکل ضبط تحریرمیں لے آئے گئے، اللہ تعالیٰ ازہری صاحب کی مغفرت کرے اوران کی خدمات کوان کے لئے صدقۂ جاریہ بنائے۔(آمین)

عبدالمنان سلفیؔ

ڈاکٹرمقتدیٰ حسن ازہری
کی خدمات کو خراج تحسین
۲۰۰۹ء ؁ میں ملت وجماعت کو جن گراں قدراور عظیم علمی و دعوتی شخصیتوں کی وفات کا غم سہناپڑا ان میں مفکرجماعت استاذمحترم جناب ڈاکٹرمقتدیٰ حسن ازہری رحمہ اللہ جیسی عبقری شخصیت کاسانحۂ وفات سب سے غم انگیز،دل فگاراور افسوس ناک رہا کہ آپ کے اٹھ جانے سے علم و ادب کی مجلسیں سونی ہوگئیں، دعوتی، تدریسی، تصنیفی اور صحافتی میدانوں میں زبردست خلا پیدا ہوگیا اورملت کو ناقابل تلافی خسارہ سے دوچار ہونا پڑا، اللہ تعالیٰ آپ کو غریق رحمت فرمائے اور آپ کی جملہ خدمات کو شرف قبول عطا فرماتے ہوئے آپ کے درجات بلند کرے، آمین۔
ڈاکٹرمقتدیٰ حسن ازہری کی شخصیت بڑی ہمہ گیر اور ان کی خدمات بڑی متنوع اورہمہ جہت تھیں، علمی اورادبی دنیا میں ان کا نام بڑا معتبر اور محترم ماناجاتا تھا اوراہل علم کے دلوں میں ان کی بڑی قدرومنزلت تھی، تدریس وتربیت سے لے کر تصنیف وتالیف، ترجمہ وتحقیق ،صحافت وانشاء پردازی اورانتظام وانصرام تک موصوف نے جس میدان میں بھی قدم رکھا اپنی صلاحیت وقابلیت کالوہا تومنوایا ہی ، ہرمیدان میں اپنی ایک الگ پہچان بنائی اورچالیس بیالیس سال کی عملی زندگی میں ان میدانوں میں ایسے نمایاں کارنامے انجام دئے جن کی مثال عصرحاضر کے علماء میں نایاب نہ سہی تو کمیاب ضرورہے، موصوف بیک وقت کہنہ مشق مدرس، مشفق مربی، منجھے ہوئے صحافی وقلم کار، اور تحقیقی وادبی ذوق سے سرشار اعلیٰ پایہ کے مصنف ومترجم تھے، یہ تمام خوبیاں ایک ساتھ کسی ایک شخص کے اندرمشکل سے جمع ہوتی ہیں، اورسچی بات تویہ ہے کہ انھیں اوصاف و اعمال نے آپ کو عبقری اور نابغۂ روزگار بنادیا۔
جامعہ سراج العلوم السلفیہ،جھنڈانگر(نیپال) کا تعلق شہربنارس، اہالیان بنارس،جامعہ سلفیہ، ذمہ داران جامعہ اور اساتذۂ جامعہ خصوصاً ڈاکٹرمقتدیٰ حسن ازہری رحمہ اللہ سے بڑا قدیم اورگہرا رہاہے، جامعہ سراج العلوم کے سابق ناظم خطیب الاسلام علامہ عبدالرؤف رحمانی جھنڈانگری رحمہ اللہ نے جامعہ رحمانیہ بنارس میں اپنے زمانۂ طالب علمی کے چند برس گذارکر مولانا محمد منیرخاں بنارسی اور قاری احمد سعید بنارسی رحمہما اللہ جیسے یگانۂ روزگار علماء و فضلاء سے کسب فیض کیاہے اور دارالحدیث رحمانیہ دہلی سے فراغت کے بعدکئی سال تک اپنے مادر علمی جامعہ رحمانیہ میں تدریسی خدمت انجام دیتے ہوئے ملا حسن،شرح تہذیب اور دیوان متنبی جیسی اہم اور فنی کتابوں کا درس دیا ہے، اس کا تذکرہ علامہ جھنڈانگری نے اپنے ایک خود نوشت میں کیا ہے اور اپنے نامور تلامذہ میں مولانا محمد یحیٰ ،مولانا محمد الیاس ،مولانا محمد موسی،مولانا عبید الرحمن اور مولانا عبد العظیم کے اسماء بہ طور خاص ذکرفرمائے ہیں،(ماہنامہ السراج ،خطیب الاسلام نمبر ص ۴۱۱)
اسی طرح یہ تاریخی حقیقت بھی ہے کہ علامہ جھنڈانگری رحمہ اللہ جامعہ سلفیہ کے محرک اول اور اس کے مؤسسین میں سے تھے،اس اجمال کی تفصیل یہ ہے کہ آپ ہی نے نوگڈھ کانفرنس منعقدہ ۱۹۶۱ء میں اپنے خطبۂ استقبالیہ کے اندر اس کی پرزور تحریک فرمائی تھی اور جماعت کو ایک مرکزی تعلیمی ادارہ کے قیام کی ضرورت کا احساس دلایا تھا، چنانچہ آپ نے اپنے تحریری استقبالیہ خطبہ میں لکھا تھاکہ:
’’ ایک ایسا مرکزی دارالعلوم بھی قائم کیا جانا ضروری ہے جس کے تعلیم یافتہ افاضل ملک و ملت کی خدمت اور اس کی بہترین رہنمائی کی اہلیت و صلاحیت سے بہرہ ور ہوں‘‘
پھر اس کی افادیت و اہمیت اور ضرورت کا ذکر کرتے آپ نے آگے مزید لکھا کہ:
’’اس لئے ایک ایسے مرکزی دارالعلوم کی ضرورت ہے جہاں کی تعلیم و تربیت سے طلبہ مزید اختصاص و امتیاز اور ایسے اوصاف حاصل کریں کہ ملک و ملت کی خدمت و رہنمائی کے قابل بن سکیں، صدر محترم سے گذارش ہے کہ ایسے دارالعلوم کے قیام کے مسئلہ پر ہر ممکن توجہ دے کر اس کے لئے اقدام فرمائیں‘‘ ۔
اس حوالہ سے خطیب الاسلام رحمہ اللہ نے اپنے ایک تحریری انٹرویو میں فرمایاکہ:
’’ میری اس گذارش کایہ اثرہوا کہ دوسرے دن نوگڈھ کانفرنس ہی میں جو میٹنگ ہوئی اس میں فوری طور پر ایک مرکزی درسگاہ کے قیام کی منظوری متفقہ طور پر ہو گئی‘‘ ( ماہنامہ السراج خطیب الاسلام نمبر ص ۴۳۹)
جامعہ سلفیہ بنارس کے موجودہ ناظم مولانا عبد اللہ سعود سلفی نے خطیب الاسلام کی وفات پربھیجے گئے اپنے تعزیتی خط میں اس حقیقت کا کھلے لفظوں میں اعتراف کیا ہے اور مولانا جھنڈانگری کے جامعہ سلفیہ سے اس تعلق کا ذکر ان الفاظ میں کیا ہے:
’’مولانا کا اہل بنارس سے بہت پرانا ربط تھا، وہ جامعہ سلفیہ کے مؤسسین میں سے تھے، نوگڈھ کے اجلاس میں آپ نے خطبۂ استقبالیہ میں جس طرح سے ایک مرکزی ادارہ کی ضرورت کو اجاگر کیا ہے وہ آپ کے جماعتی درد اور اصلاح و ترقی کی تڑپ کی غماز ہے، مولانا کاجامعہ سے دلی لگاؤ تھا اور وہ اسے ہمیشہ قدر کی نگاہ سے دیکھتے تھے‘‘ ( ماہنامہ السراج خطیب الاسلام نمبر ص ۶۱۵)
جامعہ سلفیہ بنارس کے وکیل الجامعہ اور صدر جناب ڈاکٹر مقتدی حسن ازہری رحمہ اللہ نے بھی خطیب الاسلام پر لکھے گئے اپنے گراں قدر مضمون میں اس کا ذکر کیا ہے بلکہ ’’مرکزی دارالعلوم سے خطیب الاسلام کا تعلق‘‘کے عنوان سے اس ربط و تعلق کو اجاگر فرمایا ہے، موصوف جامعہ سلفیہ بنارس کے قیام میں نوگڈھ کانفرنس اور اس کے خطبۂ استقبالیہ کے کردارکا تذکرہ کرتے ہوئے لکھتے ہیں:
’’یہیں سے عملی طور پر مرکزی درس گاہ کے وجود و ترقی میں آپ کی حصہ داری شروع ہوئی اور حیات مستعار کے اختتام تک یہ سلسلہ جاری رہا، اہل حدیث کانفرنس کے اپنے اجتماعات اور قیام کے بعد جامعہ سلفیہ کے اجتماعات میں بالالتزام آپ کی شرکت ہوتی تھی اور آپ کی گفتگو اور مشوروں سے یہ اجتماعات کامیاب ہوتے تھے، وقت گذرنے کے ساتھ ساتھ مرکزی دارالعلوم سے تعلقات مضبوط تر ہوتے گئے، حتی کہ صحت کی بعض مجبوریوں کے باوجود آپ دارالعلوم کے اجتماعات میں برابر شریک ہوئے اور ہر موقع پر ادارہ کی بہی خواہی کو مقدم رکھا، بیرون ملک آپ سے ملاقات کے مواقع حاصل رہے، وہاں بھی آپ نے ہمیشہ ادارہ (جامعہ سلفیہ)کے مفاد کو مقدم رکھا، مجلس منتظمہ کی میٹنگ میں شرکت کے لئے یا اپنی کسی ضرورت کے لئے بنارس تشریف لاتے تو دارالعلوم میں اساتذہ و طلبہ کو خطاب فرماتے اور نام لے لے کر لوگوں کی تعریف کرتے اور طلبہ کو استفادہ کی تلقین کرتے، یہاں سے شائع ہونے والے اردو مجلہ کو آپ کا قلمی تعاون برابر حاصل رہا اور بعض بے حد اہم مضامین بھی آپ نے پرچہ کو مرحمت فرمائے‘‘ ( ماہنامہ السراج خطیب الاسلام نمبر ص ۳۷)
جامعہ سلفیہ کے قیام کے فیصلہ کے بعداس کی تعمیر وترقی میں بھی مولانا جھنڈانگری نے زبردست عملی جدوجہد فرمائی ہے اوربجٹ کی فراہمی کے سلسلہ میں کئی دورے کئے ہیں،چنانچہ مولانا نے اپنے تحریری انٹرویو میں خود لکھا ہے کہ:
’’میں نے اور مولانا عبد الجلیل رحمانی نے جو پانچ ہزار(۱۹۶۳ء میں یہ ایک خطیر رقم تصور کی جاتی تھی) دینے کا عہد کیا تھا اپنے وقت پر پورا کردیا تھا،سخت گرمیوں میں ہم لوگ رکشہ پر نکلتے تھے اور جہاں کہیں سڑک پر نل مل جاتا رکشے سے اتر کر پانی پیتے اور پھر آگے بڑھ جاتے ، ایسے ہی سفر کرتے رہے، کئی روز سفر کر کے ہم لوگوں نے پانچ ہزار کی رقم اکٹھا کی اور ناظم جامعہ کے پاس بھیج دیا، اس کے علاوہ کئی مقامات پر مولانا عبد الوحید صاحب ناظم مرکزی دارالعلوم کے ساتھ چندہ کے لئے میں نکلا، جہاں ہم لوگ پہنچتے وہاں تقریر کا پروگرام ہوتا، تقریر کے اختتام پر میں چندہ کی تحریک کرتا اور مولانا عبد الوحید صاحب ناظم جامعہ چندہ کا استقبال کرتے، الحمد للہ اسی وقت دارالعلوم کے لئے اچھا خاصا چندہ جمع ہوگیا تھا‘‘(ماہنامہ السراج خطیب الاسلام نمبر ۴۳۹)۔
جامعہ سلفیہ کے قیام کے بعددسیوں برس تک خطیب الاسلام علامہ جھنڈانگری رحمہ اللہ جامعہ کی مجلس شوریٰ کے ممبربھی رہے، اوراس کی میٹنگوں میں پوری پابندی کے ساتھ شریک ہوتے رہے، ان تمام حوالوں سے ان کا بنارس آنا جاناکثرت سے ہوتاتھا، رؤساء مدن پورہ بھی آپ کی بڑی قدرکرتے تھے، ناظم جامعہ مولاناعبدالوحید سلفی، الحاج محمدصدیق، مولانا محمدیحی بنارسی ،مولانامحمدزبیراورمولانا عبدالقدوس نسیمؔ بنارسی رحمہم اللہ جیسے مخلص اورذمہ دارقسم کے لوگ خصوصاً مولاناجھنڈانگری کی بیحد توقیر وتکریم فرماتے تھے۔
۱۹۷۷ء ؁میں خطیب الاسلام علامہ عبدالرؤف رحمانی رحمہ اللہ جب رابطہ عالم اسلامی مکہ مکرمہ کی مجلس تأسیسی کے رکن منتخب ہوئے اورعرب دنیا سے آپ کا رابطہ مستحکم ہواتواپنے مضامین ،رپورٹس و تقاریر ا ور خطوط ورسائل کی تعریب کے لئے آپ نے ڈاکٹرازہری رحمہ اللہ سے مددلی، مولاناجھنڈانگری باوجویکہ مختلف علوم وفنون کے ماہر تھے اوراردومیں ان کا قلم بڑا سیال تھا تاہم خاص ماحول اور مشق ومزاولت کے فقدان کے سبب فصیح وبلیغ عربی لکھنے پر قادر نہ تھے، اس لئے جب انھیں کوئی اہم خط لکھنا ہوتا یا کسی خاص موضوع پرانھیں تقریر ورپورٹ پیش کرنی ہوتی تواس کی تعریب کے لئے خودجامعہ سلفیہ تشریف لے جاتے اورڈاکٹر ازہری صاحب کی خدمت میں اپنا مدعا پیش فرماتے، ازہری صاحب خطیب الاسلام کے بڑے قدرداں تھے اوران کا غایت درجہ احترام واکرام فرماتے، اپنے ضروری کاموں کو چھوڑکر خطیب الاسلام کے خطوط ورسائل اور دیگرچیزوں کی خود تعریب کرتے اور پھرانھیں اپنے ہاتھ سے ٹائپ کرتے یا کمپوز کراتے، تعاون باہمی کا یہ سلسلہ برسوں چلتا رہا، کم ازکم ۱۹۸۲ء ؁ تک تواس کا مشاہدہ میں نے خود کیاہے۔
جامعہ سلفیہ بنارس اور جامعہ سراج العلوم السلفیہ جھنڈانگر نیپال کے درمیان اس گہرے ربط و تعلق کا نتیجہ تھا کہ جب جامعہ سلفیہ بنارس کے روح رواں اور صدر جناب ڈاکٹر مقتدیٰ حسن ازہری رحمہ اللہ کی وفات کا سانحہ پیش آیا اوراس کی خبرجامعہ میں پہونچی توسراج العلوم نے اسے اپنا غم تصور کیا اور یہاں کے درودیوار پر سوگواری کے اثرات ظاہر ہوگئے، ناظم جامعہ مولاناشمیم احمد ندوی حفظہ اللہ قطرکے سفرپر روانہ ہونے کے لئے لکھنؤ پہونچ چکے تھے اور راقم خود سفر حج کے سلسلہ میں لکھنؤمیں موجود تھا،جنازہ میں شرکت نہ کرپانے پر ہم دونوں ہی دل مسوس کے رہ گئے ،تاہم ناظم محترم نے بذریعہ موبائل فون اساتذۂ جامعہ کو جنازہ میں شرکت کی ہدایت فرمائی اوراس کے لئے گاڑی کا انتظام کیا اوراساتذہ کی ایک بڑی تعداد نے نماز جنازہ میں شرکت کی سعادت حاصل کی، اورسفر سے واپسی کے بعد نومبر ۲۰۰۹ء ؁ کے شمارہ میں ناظم جامعہ ومدیرمسؤل ماہنامہ ’’السراج‘‘ مولانا شمیم احمدندوی نے ایک تعزیتی مضمون لکھ کرازہری صاحب کی خدمات کو خراج تحسین پیش کیا اورآپ کی علمی ودعوتی خدمات کو سراہا۔
ہند و نیپال کے ان دونوں بڑے جامعات کے مابین اس گہرے ربط و تعلق کی بنیاد پر اور نئی نسل کوڈاکٹرازہری رحمہ اللہ کی قدآور،نابغۂ روزگارشخصیت سے واقف کرانے اورآپ کی ہمہ جہت علمی، ادبی، تعلیمی،تصنیفی، دعوتی و صحافتی خدمات کو خراج تحسین پیش کرنے کے لئے ماہنامہ’’السراج‘‘ نے ایک خصوصی نمبر شائع کرنے کا فیصلہ کیااور ناظم جامعہ کے مشورہ سے بہ عجلت ایک خاکہ بنایاگیا اورمحدود پیمانہ پرعلاقہ اورآس پاس کے بعض اہل قلم حضرات کوازہری صاحب کی خدمات کے کسی اہم گوشہ پر لکھنے کی زحمت دی گئی، ہمیں خوشی ہے کہ ہمارے بعض احباب اوربزرگوں نے ہماری درخواست کوشرف قبول بخشا اوراپنے گراں قدرمضامین سے ہمیں نوازکر ہمارا حوصلہ بڑھایا، ہم ان کے شکرگذار ہیں نیز جنھوں نے خاموشی اختیارکی یا معذرت کرلی ہم انھیں معذورتصورکرتے ہیں۔
میرے بعض دعوتی اسفار اور تدریسی،دعوتی و دفتری مصروفیات کے باوجود خصوصی اشاعت کے لئے مضامین کی کمپوزنگ مارچ کے اوائل میں مکمل ہوچکی تھی، اورارادہ تھا کہ مارچ ، اپریل اور مئی کے مشترکہ شمارہ کو خصوصی اشاعت کے طورپرنذر قارئین کردیاجائے گا،مگر بعض وجوہات سے ایسا نہ ہوسکا، اورایک ماہ کی مزید تاخیر ہوگئی تاہم اس کا فائدہ یہ ہوا کہ چند قیمتی مضامین ہمیں مزید دستیاب ہوگئے۔
خصوصی اشاعت کو منظر عام لانے کے لئے جب کہ ساری تیاریاں مکمل ہوچکی تھیں اور ناظم جامعہ و مدیر مسؤل ماہنامہ السراج مولانا شمیم احمد ندوی حفظہ اللہ اس کے لئے اپنا گراں قدر اداریہ لکھنے کا ذہن بناچکے تھے کہ اچانک عارضۂ قلب میں مبتلا ہونے کے سبب موصوف کی طبیعت ناساز ہوگئی اور چیک اَپ و علاج کے لئے آپ کو ہفتہ عشرہ لکھنؤ میں قیام کرنا پڑا،پھر جامعہ واپس تشریف لانے کے بعد بھی معالج کے مشورہ کے مطابق کچھ دنوں کے لئے آپ کو اپنی علمی و دعوتی سرگرمیاں موقوف کرنا پڑیں ،اس طرح ہمارے باذوق قارئین کرام آپ کے گراں قدر ادارتی مضمون سے محروم رہ گئے، اللہ تعالیٰ سے دعا ہے کہ وہ اپنے فضل خاص سے موصوف کوشفاء کاملہ وعاجلہ سے نوازے اورصحت وعافیت کے ساتھ دیرتک اپنے دین کی خدمت کی توفیق بخشے۔(آمین)
آخر میں ایک بات کی وضاحت ضروری ہے کہ ترتیب مضامین کے سلسلہ میں پہلے یہ بات ذہن میں تھی کہ استاد محترم کی حیات،اخلاقیات اور خدمات وغیرہ عناوین کے تحت مضامین ترتیب دئے جائیں مگر ایسا اس لئے نہ ہوسکا کہ ہمیں موصول ہونے والے مضامین میں اکثر تاثراتی تھے، گو کہ بعض اہل قلم حضرات نے آپ کی علمی خدمات کو اجاگر کرنے کوشش کی ہے اور آپ کی بعض کتابوں اور ترجموں کے تعارف پر مشتمل مضامین قلم بند فرمائے ہیں،لیکن بد قسمتی سے آپ کے مکمل سوانحی خاکہ پر ہمیں کوئی مضمون نہ مل سکا، میں آپ کے اخلاقیات کے سلسلہ میں ایک مضمون لکھ چکا تھا مگر اس کمی کی تلافی کے لئے موصوف کی حیات و خدمات کے حوالہ سے ایک اورمضمون مرتب کرنا پڑا جس میں آپ کی بعض اہم خدمات کی جانب صرف اشارہ ہی ہوسکا ہے، باقی تاثراتی قسم کے مضامین میں اہل قلم حضرات نے اپنے مشاہدات اور ذاتی تاثرات کی روشنی میں ازہری صاحب کے اخلاقی پہلؤں کو نمایاں کرنے کی کوشش کی ہے، اس طرح اس خصوصی اشاعت میں ڈاکٹر ازہری رحمہ اللہ جیسی ہمہ جہت شخصیت کی زندگی اور خدمات کے چند ہی گوشے نمایاں کئے جاسکے ہیں اور استطاعت بھر آں رحمہ اللہ کو خراج تحسین پیش کرنے کی کوشش کی گئی ہے، اس کوشش میں ہم کس قدر کامیاب ہیں اس کا فیصلہ باذوق قارئین فرمائیں گے،تاہم اہل نظر حضرات سے یہ گذارش ہے کہ اپنے گراں قدر تاثرات اور خیالات سے ضرور آگاہ فرمائیں اور اگر کوئی علمی یا تاریخی فروگذاشت انھیں نظر آئے تو اس سے ہمیں باخبر کریں، اللہ تعالی جزاء خیر عطا فرمائے گا۔
آخر میں دعا ہے کہ اللہ تعالیٰ استاد محترم کی بال بال مغفرت فرمائے، ان کی بشری لغزشوں اور کوتاہیوں کو معاف کرے اور ان کی جملہ خدمات کو قبول کرتے ہوئے آپ کے درجات بلند فرمائے اور ان کے علمی و دعوتی کاموں کو صدقۂ جاریہ اور ذخیرۂ آخرت بنائے اور ان پر اپنی رحمتوں کی بارش برساتا رہے، اللہم اغفر لہ و ارحمہ و عافہ و اعف عنہ و أکرم نزلہ و وسّع مدخلہ و أدخلہ الفردوس الأعلیٰ۔(آمین)

عبدالمنان سلفیؔ

ڈاکٹرمقتدیٰ حسن ازہری
کی خدمات کو خراج تحسین
۲۰۰۹ء ؁ میں ملت وجماعت کو جن گراں قدراور عظیم علمی و دعوتی شخصیتوں کی وفات کا غم سہناپڑا ان میں مفکرجماعت استاذمحترم جناب ڈاکٹرمقتدیٰ حسن ازہری رحمہ اللہ جیسی عبقری شخصیت کاسانحۂ وفات سب سے غم انگیز،دل فگاراور افسوس ناک رہا کہ آپ کے اٹھ جانے سے علم و ادب کی مجلسیں سونی ہوگئیں، دعوتی، تدریسی، تصنیفی اور صحافتی میدانوں میں زبردست خلا پیدا ہوگیا اورملت کو ناقابل تلافی خسارہ سے دوچار ہونا پڑا، اللہ تعالیٰ آپ کو غریق رحمت فرمائے اور آپ کی جملہ خدمات کو شرف قبول عطا فرماتے ہوئے آپ کے درجات بلند کرے، آمین۔ڈاکٹرمقتدیٰ حسن ازہری کی شخصیت بڑی ہمہ گیر اور ان کی خدمات بڑی متنوع اورہمہ جہت تھیں، علمی اورادبی دنیا میں ان کا نام بڑا معتبر اور محترم ماناجاتا تھا اوراہل علم کے دلوں میں ان کی بڑی قدرومنزلت تھی، تدریس وتربیت سے لے کر تصنیف وتالیف، ترجمہ وتحقیق ،صحافت وانشاء پردازی اورانتظام وانصرام تک موصوف نے جس میدان میں بھی قدم رکھا اپنی صلاحیت وقابلیت کالوہا تومنوایا ہی ، ہرمیدان میں اپنی ایک الگ پہچان بنائی اورچالیس بیالیس سال کی عملی زندگی میں ان میدانوں میں ایسے نمایاں کارنامے انجام دئے جن کی مثال عصرحاضر کے علماء میں نایاب نہ سہی تو کمیاب ضرورہے، موصوف بیک وقت کہنہ مشق مدرس، مشفق مربی، منجھے ہوئے صحافی وقلم کار، اور تحقیقی وادبی ذوق سے سرشار اعلیٰ پایہ کے مصنف ومترجم تھے، یہ تمام خوبیاں ایک ساتھ کسی ایک شخص کے اندرمشکل سے جمع ہوتی ہیں، اورسچی بات تویہ ہے کہ انھیں اوصاف و اعمال نے آپ کو عبقری اور نابغۂ روزگار بنادیا۔
جامعہ سراج العلوم السلفیہ،جھنڈانگر(نیپال) کا تعلق شہربنارس، اہالیان بنارس،جامعہ سلفیہ، ذمہ داران جامعہ اور اساتذۂ جامعہ خصوصاً ڈاکٹرمقتدیٰ حسن ازہری رحمہ اللہ سے بڑا قدیم اورگہرا رہاہے، جامعہ سراج العلوم کے سابق ناظم خطیب الاسلام علامہ عبدالرؤف رحمانی جھنڈانگری رحمہ اللہ نے جامعہ رحمانیہ بنارس میں اپنے زمانۂ طالب علمی کے چند برس گذارکر مولانا محمد منیرخاں بنارسی اور قاری احمد سعید بنارسی رحمہما اللہ جیسے یگانۂ روزگار علماء و فضلاء سے کسب فیض کیاہے اور دارالحدیث رحمانیہ دہلی سے فراغت کے بعدکئی سال تک اپنے مادر علمی جامعہ رحمانیہ میں تدریسی خدمت انجام دیتے ہوئے ملا حسن،شرح تہذیب اور دیوان متنبی جیسی اہم اور فنی کتابوں کا درس دیا ہے، اس کا تذکرہ علامہ جھنڈانگری نے اپنے ایک خود نوشت میں کیا ہے اور اپنے نامور تلامذہ میں مولانا محمد یحیٰ ،مولانا محمد الیاس ،مولانا محمد موسی،مولانا عبید الرحمن اور مولانا عبد العظیم کے اسماء بہ طور خاص ذکرفرمائے ہیں،(ماہنامہ السراج ،خطیب الاسلام نمبر ص ۴۱۱)
اسی طرح یہ تاریخی حقیقت بھی ہے کہ علامہ جھنڈانگری رحمہ اللہ جامعہ سلفیہ کے محرک اول اور اس کے مؤسسین میں سے تھے،اس اجمال کی تفصیل یہ ہے کہ آپ ہی نے نوگڈھ کانفرنس منعقدہ ۱۹۶۱ء میں اپنے خطبۂ استقبالیہ کے اندر اس کی پرزور تحریک فرمائی تھی اور جماعت کو ایک مرکزی تعلیمی ادارہ کے قیام کی ضرورت کا احساس دلایا تھا، چنانچہ آپ نے اپنے تحریری استقبالیہ خطبہ میں لکھا تھاکہ:
’’ ایک ایسا مرکزی دارالعلوم بھی قائم کیا جانا ضروری ہے جس کے تعلیم یافتہ افاضل ملک و ملت کی خدمت اور اس کی بہترین رہنمائی کی اہلیت و صلاحیت سے بہرہ ور ہوں‘‘
پھر اس کی افادیت و اہمیت اور ضرورت کا ذکر کرتے آپ نے آگے مزید لکھا کہ:
’’اس لئے ایک ایسے مرکزی دارالعلوم کی ضرورت ہے جہاں کی تعلیم و تربیت سے طلبہ مزید اختصاص و امتیاز اور ایسے اوصاف حاصل کریں کہ ملک و ملت کی خدمت و رہنمائی کے قابل بن سکیں، صدر محترم سے گذارش ہے کہ ایسے دارالعلوم کے قیام کے مسئلہ پر ہر ممکن توجہ دے کر اس کے لئے اقدام فرمائیں‘‘ ۔اس حوالہ سے خطیب الاسلام رحمہ اللہ نے اپنے ایک تحریری انٹرویو میں فرمایاکہ:
’’ میری اس گذارش کایہ اثرہوا کہ دوسرے دن نوگڈھ کانفرنس ہی میں جو میٹنگ ہوئی اس میں فوری طور پر ایک مرکزی درسگاہ کے قیام کی منظوری متفقہ طور پر ہو گئی‘‘ ( ماہنامہ السراج خطیب الاسلام نمبر ص ۴۳۹)
جامعہ سلفیہ بنارس کے موجودہ ناظم مولانا عبد اللہ سعود سلفی نے خطیب الاسلام کی وفات پربھیجے گئے اپنے تعزیتی خط میں اس حقیقت کا کھلے لفظوں میں اعتراف کیا ہے اور مولانا جھنڈانگری کے جامعہ سلفیہ سے اس تعلق کا ذکر ان الفاظ میں کیا ہے:
’’مولانا کا اہل بنارس سے بہت پرانا ربط تھا، وہ جامعہ سلفیہ کے مؤسسین میں سے تھے، نوگڈھ کے اجلاس میں آپ نے خطبۂ استقبالیہ میں جس طرح سے ایک مرکزی ادارہ کی ضرورت کو اجاگر کیا ہے وہ آپ کے جماعتی درد اور اصلاح و ترقی کی تڑپ کی غماز ہے، مولانا کاجامعہ سے دلی لگاؤ تھا اور وہ اسے ہمیشہ قدر کی نگاہ سے دیکھتے تھے‘‘ ( ماہنامہ السراج خطیب الاسلام نمبر ص ۶۱۵)
جامعہ سلفیہ بنارس کے وکیل الجامعہ اور صدر جناب ڈاکٹر مقتدی حسن ازہری رحمہ اللہ نے بھی خطیب الاسلام پر لکھے گئے اپنے گراں قدر مضمون میں اس کا ذکر کیا ہے بلکہ ’’مرکزی دارالعلوم سے خطیب الاسلام کا تعلق‘‘کے عنوان سے اس ربط و تعلق کو اجاگر فرمایا ہے، موصوف جامعہ سلفیہ بنارس کے قیام میں نوگڈھ کانفرنس اور اس کے خطبۂ استقبالیہ کے کردارکا تذکرہ کرتے ہوئے لکھتے ہیں:
’’یہیں سے عملی طور پر مرکزی درس گاہ کے وجود و ترقی میں آپ کی حصہ داری شروع ہوئی اور حیات مستعار کے اختتام تک یہ سلسلہ جاری رہا، اہل حدیث کانفرنس کے اپنے اجتماعات اور قیام کے بعد جامعہ سلفیہ کے اجتماعات میں بالالتزام آپ کی شرکت ہوتی تھی اور آپ کی گفتگو اور مشوروں سے یہ اجتماعات کامیاب ہوتے تھے، وقت گذرنے کے ساتھ ساتھ مرکزی دارالعلوم سے تعلقات مضبوط تر ہوتے گئے، حتی کہ صحت کی بعض مجبوریوں کے باوجود آپ دارالعلوم کے اجتماعات میں برابر شریک ہوئے اور ہر موقع پر ادارہ کی بہی خواہی کو مقدم رکھا، بیرون ملک آپ سے ملاقات کے مواقع حاصل رہے، وہاں بھی آپ نے ہمیشہ ادارہ (جامعہ سلفیہ)کے مفاد کو مقدم رکھا، مجلس منتظمہ کی میٹنگ میں شرکت کے لئے یا اپنی کسی ضرورت کے لئے بنارس تشریف لاتے تو دارالعلوم میں اساتذہ و طلبہ کو خطاب فرماتے اور نام لے لے کر لوگوں کی تعریف کرتے اور طلبہ کو استفادہ کی تلقین کرتے، یہاں سے شائع ہونے والے اردو مجلہ کو آپ کا قلمی تعاون برابر حاصل رہا اور بعض بے حد اہم مضامین بھی آپ نے پرچہ کو مرحمت فرمائے‘‘ ( ماہنامہ السراج خطیب الاسلام نمبر ص ۳۷)
جامعہ سلفیہ کے قیام کے فیصلہ کے بعداس کی تعمیر وترقی میں بھی مولانا جھنڈانگری نے زبردست عملی جدوجہد فرمائی ہے اوربجٹ کی فراہمی کے سلسلہ میں کئی دورے کئے ہیں،چنانچہ مولانا نے اپنے تحریری انٹرویو میں خود لکھا ہے کہ:
’’میں نے اور مولانا عبد الجلیل رحمانی نے جو پانچ ہزار(۱۹۶۳ء میں یہ ایک خطیر رقم تصور کی جاتی تھی) دینے کا عہد کیا تھا اپنے وقت پر پورا کردیا تھا،سخت گرمیوں میں ہم لوگ رکشہ پر نکلتے تھے اور جہاں کہیں سڑک پر نل مل جاتا رکشے سے اتر کر پانی پیتے اور پھر آگے بڑھ جاتے ، ایسے ہی سفر کرتے رہے، کئی روز سفر کر کے ہم لوگوں نے پانچ ہزار کی رقم اکٹھا کی اور ناظم جامعہ کے پاس بھیج دیا، اس کے علاوہ کئی مقامات پر مولانا عبد الوحید صاحب ناظم مرکزی دارالعلوم کے ساتھ چندہ کے لئے میں نکلا، جہاں ہم لوگ پہنچتے وہاں تقریر کا پروگرام ہوتا، تقریر کے اختتام پر میں چندہ کی تحریک کرتا اور مولانا عبد الوحید صاحب ناظم جامعہ چندہ کا استقبال کرتے، الحمد للہ اسی وقت دارالعلوم کے لئے اچھا خاصا چندہ جمع ہوگیا تھا‘‘(ماہنامہ السراج خطیب الاسلام نمبر ۴۳۹)۔
جامعہ سلفیہ کے قیام کے بعددسیوں برس تک خطیب الاسلام علامہ جھنڈانگری رحمہ اللہ جامعہ کی مجلس شوریٰ کے ممبربھی رہے، اوراس کی میٹنگوں میں پوری پابندی کے ساتھ شریک ہوتے رہے، ان تمام حوالوں سے ان کا بنارس آنا جاناکثرت سے ہوتاتھا، رؤساء مدن پورہ بھی آپ کی بڑی قدرکرتے تھے، ناظم جامعہ مولاناعبدالوحید سلفی، الحاج محمدصدیق، مولانا محمدیحی بنارسی ،مولانامحمدزبیراورمولانا عبدالقدوس نسیمؔ بنارسی رحمہم اللہ جیسے مخلص اورذمہ دارقسم کے لوگ خصوصاً مولاناجھنڈانگری کی بیحد توقیر وتکریم فرماتے تھے۱۹۷۷ء ؁میں خطیب الاسلام علامہ عبدالرؤف رحمانی رحمہ اللہ جب رابطہ عالم اسلامی مکہ مکرمہ کی مجلس تأسیسی کے رکن منتخب ہوئے اورعرب دنیا سے آپ کا رابطہ مستحکم ہواتواپنے مضامین ،رپورٹس و تقاریر ا ور خطوط ورسائل کی تعریب کے لئے آپ نے ڈاکٹرازہری رحمہ اللہ سے مددلی، مولاناجھنڈانگری باوجویکہ مختلف علوم وفنون کے ماہر تھے اوراردومیں ان کا قلم بڑا سیال تھا تاہم خاص ماحول اور مشق ومزاولت کے فقدان کے سبب فصیح وبلیغ عربی لکھنے پر قادر نہ تھے، اس لئے جب انھیں کوئی اہم خط لکھنا ہوتا یا کسی خاص موضوع پرانھیں تقریر ورپورٹ پیش کرنی ہوتی تواس کی تعریب کے لئے خودجامعہ سلفیہ تشریف لے جاتے اورڈاکٹر ازہری صاحب کی خدمت میں اپنا مدعا پیش فرماتے، ازہری صاحب خطیب الاسلام کے بڑے قدرداں تھے اوران کا غایت درجہ احترام واکرام فرماتے، اپنے ضروری کاموں کو چھوڑکر خطیب الاسلام کے خطوط ورسائل اور دیگرچیزوں کی خود تعریب کرتے اور پھرانھیں اپنے ہاتھ سے ٹائپ کرتے یا کمپوز کراتے، تعاون باہمی کا یہ سلسلہ برسوں چلتا رہا، کم ازکم ۱۹۸۲ء ؁ تک تواس کا مشاہدہ میں نے خود کیاہے۔
جامعہ سلفیہ بنارس اور جامعہ سراج العلوم السلفیہ جھنڈانگر نیپال کے درمیان اس گہرے ربط و تعلق کا نتیجہ تھا کہ جب جامعہ سلفیہ بنارس کے روح رواں اور صدر جناب ڈاکٹر مقتدیٰ حسن ازہری رحمہ اللہ کی وفات کا سانحہ پیش آیا اوراس کی خبرجامعہ میں پہونچی توسراج العلوم نے اسے اپنا غم تصور کیا اور یہاں کے درودیوار پر سوگواری کے اثرات ظاہر ہوگئے، ناظم جامعہ مولاناشمیم احمد ندوی حفظہ اللہ قطرکے سفرپر روانہ ہونے کے لئے لکھنؤ پہونچ چکے تھے اور راقم خود سفر حج کے سلسلہ میں لکھنؤمیں موجود تھا،جنازہ میں شرکت نہ کرپانے پر ہم دونوں ہی دل مسوس کے رہ گئے ،تاہم ناظم محترم نے بذریعہ موبائل فون اساتذۂ جامعہ کو جنازہ میں شرکت کی ہدایت فرمائی اوراس کے لئے گاڑی کا انتظام کیا اوراساتذہ کی ایک بڑی تعداد نے نماز جنازہ میں شرکت کی سعادت حاصل کی، اورسفر سے واپسی کے بعد نومبر ۲۰۰۹ء ؁ کے شمارہ میں ناظم جامعہ ومدیرمسؤل ماہنامہ ’’السراج‘‘ مولانا شمیم احمدندوی نے ایک تعزیتی مضمون لکھ کرازہری صاحب کی خدمات کو خراج تحسین پیش کیا اورآپ کی علمی ودعوتی خدمات کو سراہا۔
ہند و نیپال کے ان دونوں بڑے جامعات کے مابین اس گہرے ربط و تعلق کی بنیاد پر اور نئی نسل کوڈاکٹرازہری رحمہ اللہ کی قدآور،نابغۂ روزگارشخصیت سے واقف کرانے اورآپ کی ہمہ جہت علمی، ادبی، تعلیمی،تصنیفی، دعوتی و صحافتی خدمات کو خراج تحسین پیش کرنے کے لئے ماہنامہ’’السراج‘‘ نے ایک خصوصی نمبر شائع کرنے کا فیصلہ کیااور ناظم جامعہ کے مشورہ سے بہ عجلت ایک خاکہ بنایاگیا اورمحدود پیمانہ پرعلاقہ اورآس پاس کے بعض اہل قلم حضرات کوازہری صاحب کی خدمات کے کسی اہم گوشہ پر لکھنے کی زحمت دی گئی، ہمیں خوشی ہے کہ ہمارے بعض احباب اوربزرگوں نے ہماری درخواست کوشرف قبول بخشا اوراپنے گراں قدرمضامین سے ہمیں نوازکر ہمارا حوصلہ بڑھایا، ہم ان کے شکرگذار ہیں نیز جنھوں نے خاموشی اختیارکی یا معذرت کرلی ہم انھیں معذورتصورکرتے ہیں۔
میرے بعض دعوتی اسفار اور تدریسی،دعوتی و دفتری مصروفیات کے باوجود خصوصی اشاعت کے لئے مضامین کی کمپوزنگ مارچ کے اوائل میں مکمل ہوچکی تھی، اورارادہ تھا کہ مارچ ، اپریل اور مئی کے مشترکہ شمارہ کو خصوصی اشاعت کے طورپرنذر قارئین کردیاجائے گا،مگر بعض وجوہات سے ایسا نہ ہوسکا، اورایک ماہ کی مزید تاخیر ہوگئی تاہم اس کا فائدہ یہ ہوا کہ چند قیمتی مضامین ہمیں مزید دستیاب ہوگئے۔
خصوصی اشاعت کو منظر عام لانے کے لئے جب کہ ساری تیاریاں مکمل ہوچکی تھیں اور ناظم جامعہ و مدیر مسؤل ماہنامہ السراج مولانا شمیم احمد ندوی حفظہ اللہ اس کے لئے اپنا گراں قدر اداریہ لکھنے کا ذہن بناچکے تھے کہ اچانک عارضۂ قلب میں مبتلا ہونے کے سبب موصوف کی طبیعت ناساز ہوگئی اور چیک اَپ و علاج کے لئے آپ کو ہفتہ عشرہ لکھنؤ میں قیام کرنا پڑا،پھر جامعہ واپس تشریف لانے کے بعد بھی معالج کے مشورہ کے مطابق کچھ دنوں کے لئے آپ کو اپنی علمی و دعوتی سرگرمیاں موقوف کرنا پڑیں ،اس طرح ہمارے باذوق قارئین کرام آپ کے گراں قدر ادارتی مضمون سے محروم رہ گئے، اللہ تعالیٰ سے دعا ہے کہ وہ اپنے فضل خاص سے موصوف کوشفاء کاملہ وعاجلہ سے نوازے اورصحت وعافیت کے ساتھ دیرتک اپنے دین کی خدمت کی توفیق بخشے۔(آمین)
آخر میں ایک بات کی وضاحت ضروری ہے کہ ترتیب مضامین کے سلسلہ میں پہلے یہ بات ذہن میں تھی کہ استاد محترم کی حیات،اخلاقیات اور خدمات وغیرہ عناوین کے تحت مضامین ترتیب دئے جائیں مگر ایسا اس لئے نہ ہوسکا کہ ہمیں موصول ہونے والے مضامین میں اکثر تاثراتی تھے، گو کہ بعض اہل قلم حضرات نے آپ کی علمی خدمات کو اجاگر کرنے کوشش کی ہے اور آپ کی بعض کتابوں اور ترجموں کے تعارف پر مشتمل مضامین قلم بند فرمائے ہیں،لیکن بد قسمتی سے آپ کے مکمل سوانحی خاکہ پر ہمیں کوئی مضمون نہ مل سکا، میں آپ کے اخلاقیات کے سلسلہ میں ایک مضمون لکھ چکا تھا مگر اس کمی کی تلافی کے لئے موصوف کی حیات و خدمات کے حوالہ سے ایک اورمضمون مرتب کرنا پڑا جس میں آپ کی بعض اہم خدمات کی جانب صرف اشارہ ہی ہوسکا ہے، باقی تاثراتی قسم کے مضامین میں اہل قلم حضرات نے اپنے مشاہدات اور ذاتی تاثرات کی روشنی میں ازہری صاحب کے اخلاقی پہلؤں کو نمایاں کرنے کی کوشش کی ہے، اس طرح اس خصوصی اشاعت میں ڈاکٹر ازہری رحمہ اللہ جیسی ہمہ جہت شخصیت کی زندگی اور خدمات کے چند ہی گوشے نمایاں کئے جاسکے ہیں اور استطاعت بھر آں رحمہ اللہ کو خراج تحسین پیش کرنے کی کوشش کی گئی ہے، اس کوشش میں ہم کس قدر کامیاب ہیں اس کا فیصلہ باذوق قارئین فرمائیں گے،تاہم اہل نظر حضرات سے یہ گذارش ہے کہ اپنے گراں قدر تاثرات اور خیالات سے ضرور آگاہ فرمائیں اور اگر کوئی علمی یا تاریخی فروگذاشت انھیں نظر آئے تو اس سے ہمیں باخبر کریں، اللہ تعالی جزاء خیر عطا فرمائے گا۔
آخر میں دعا ہے کہ اللہ تعالیٰ استاد محترم کی بال بال مغفرت فرمائے، ان کی بشری لغزشوں اور کوتاہیوں کو معاف کرے اور ان کی جملہ خدمات کو قبول کرتے ہوئے آپ کے درجات بلند فرمائے اور ان کے علمی و دعوتی کاموں کو صدقۂ جاریہ اور ذخیرۂ آخرت بنائے اور ان پر اپنی رحمتوں کی بارش برساتا رہے، اللہم اغفر لہ و ارحمہ و عافہ و اعف عنہ و أکرم نزلہ و وسّع مدخلہ و أدخلہ الفردوس الأعلیٰ۔(آمین)

ڈاکٹر مقتدی حسن ازہری-------مولانا محمد اسحاق بھٹی
ہندوستان کے صوبہ یوپی کے ایک شہر کا نام مؤ ناتھ بھنجن ہے جو کپڑے کی صنعت،علمی مراکز اور علمائے دین کا مسکن ہونے کی بنا پر صدیوں سے مشہور ہے۔ اس شہر کو یہ خصوصیت بھی حاصل ہے کہ اس میں سلفی حضرات کے تین بڑے مدارس قائم ہیں۔ ایک جامعہ عالیہ عربیہ، دوسرا جامعہ اسلامیہ جسے مدرسہ فیض عام کہا جاتا ہے اور تیسرا جامعہ اثریہ۔ ان کے علاوہ چھوٹی سطح کے متعدد مدارس جاری ہیں۔


وہاں کے بڑے مدارس نے اس نواح میں بے حد شہرت پائی۔ ہندوستان کے مختلف علاقوں اور صوبوں سے طلبا ان میں داخل ہوئے اور انہوں نے علوم دینیہ حاصل کئے۔ پھر وہ تصنیف وتالیف، دعوت وارشاد اور درس وتدریس میں مشغول ہوگئے۔ یہ وہ حضرات ہیں جن کی خدمات کے دائرے علم وعمل کے مختلف شعبوں میں پھیلے ہوئے ہیں۔


اسی علمی اور صنعتی شہر(مؤ ناتھ بھنجن)کے ایک سلفی خاندان کے ممتاز عالم دین ڈاکٹر مقتدیٰ حسن ازہری ہیں جو ۱۸؍اگست ۱۹۳۹ء ؁ کو پیدا ہوئے اور خالص علمی فضا اور مجمع علما میں پلے بڑھے۔


تعلیم کا آغاز مدرسہ دارالعلوم سے کیا جو مرزا ہادی پورہ کی شاخ ہے۔ (۱)۱۹۵۳ء ؁ میں وہاں سے حفظ قرآن کی سند لی۔ پھر اسی شہر کے مختلف سلفی مدارس میں تعلیمی مراحل طے کئے۔ جامعہ عالیہ عربیہ سے ۱۹۵۹ء ؁میں درجہ ثانویہ کی سند حاصل کیااور ۱۹۶۲ء ؁میں وہاں کی جامعہ اثریہ سے سند فراغت سے بہرہ یاب ہوئے۔ ۱۹۵۹ء ؁اور ۱۹۶۲ء ؁کے درمیانی عرصے میں صوبہ یوپی کے سرکاری تعلیمی بورڈ میں ’’مولوی، مولوی عالم اور مولوی فاضل‘‘ کے امتحانات دئے اور ان میں کامیاب ہوئے۔


اس کے بعد مصر گئے اور جامعہ ازہرمیں داخلہ لیا۔ ۱۹۶۶ء ؁ میں وہاں کے شعبہ اصول الدین میں ایم اے کی سند حاصل کی پھر جامعہ ازہر ہی میں پی ایچ ڈی میں داخلہ لیا، لیکن اس اثنا میں حالات ایسے پیدا ہوئے کہ اپنے وطن (ہندوستان) واپس آگئے اور سلسلۂ تدریس شروع کردیا۔ اسی اثنا میں ان کے دل میں اعلیٰ تعلیم کی تکمیل کا جذبہ ابھرا تو۱۹۷۲ء ؁میں ایم فل کیا۔ پھر اس سے تین سال بعد ۱۹۷۵ء ؁میں علی گڑھ مسلم یونیورسٹی سے ’’ادب عربی‘‘ میں پی ایچ ڈی کی سند لی۔ اس طرح ان کا طویل تعلیمی سفر اختتام کو پہنچا اور انہوں نے ڈاکٹر مقتدیٰ حسن ازہری کے نام سے شہرت پائی۔


اپنے تعلیمی مراحل کے مختلف حصوں میں انہوں نے جن علماء و شیوخ سے استفادہ کیا، ان میں ڈاکٹر عبدالعلی، شیخ عبدالمعید، شیخ شمس الحق سلفی، شیخ عبدالرحمن، شیخ حبیب الرحمن فیضی، شیخ عظیم اللہ،شیخ عبداللہ شائق، شیخ ابوالقاسم فیضی، ڈاکٹر علی عبدالواحد وافی اور ڈاکٹر شوقی ضیف شامل ہیں۔


۱۹۶۸ء ؁ میں ڈاکٹر مقتدیٰ حسن ازہری کو جامعہ سلفیہ(بنارس) کی تدریسی جماعت میں شامل کیا گیا۔ اس وقت جامعہ کے ناظم اعلیٰ شیخ عبدالوحید سلفی تھے جنہوں نے ڈاکٹر صاحب ممدوح کے نبوغ و فراست اور ان کی صلاحیت و قابلیت کا اندازہ کرلیا تھا۔ پھر انہیں جامعہ کے وکیل کا منصب عطا کیا گیا۔ جامعہ کا عربی مجلہ’’صوت الامۃ‘‘ ۱۹۶۹ء ؁ میں جاری ہوا تو انہیں اس کا چیف ایڈیٹر بنادیا گیا۔ اس مجلے کا وہ اداریہ بھی لکھتے اور مضامین بھی سپر قلم کرتے ہیں یہ انتہائی اہم کام ہے جو وہ باقائدگی سے کررہے ہیں۔ جامعہ کے تحقیقی و تصنیفی ادارے کا نام ’’ادارۃ البحوث الاسلامیہ‘‘ ہے ، جس کی طرف سے اب تک عربی، اردو، ہندی اور انگریزی میں چارسو سے زیادہ کتابیں شائع ہوچکی ہیں۔ڈاکٹر صاحب اس بہت بڑے ادارے کے نگراں ہیں اور ہرکتاب پر جچے تلے الفاظ میں مقدمہ تحریر فرماتے ہیں۔


اللہ نے ان کو زبان و اسلوب کی نعمت سے بھی نوازا ہے اور معلومات کی دولت بھی عطا فرمائی ہے۔ وہ مختلف رسائل و جرائد میں اردو اور عربی دونوں زبانوں میں اظہار رائے کرتے ہیں اور قارئین شوق اور دلچسپی سے ان کے مضامین پڑھتے ہیں۔ معلوم ہوا ہے کہ ان کے تحریر فرمودہ مضامین و مقالات کی تعداد پانچ سو سے آگے نکل چکی ہے۔


اب ان کی تصانیف کی طرف آیئے۔


(۱)۔۔۔ تاریخ ادب عربی: یہ کتاب پانچ جلدوں کا احاطہ کئے ہوئے ہے۔


(۲)۔۔۔ عورت کے متعلق اسلام کا نظریہ: اس موضوع کی یہ ایک قابل قدر کتاب ہے۔


(۳)۔۔۔ ادب کی حقیقت


(۴)۔۔۔ مسلمان اور اسلامی ثقافت


(۵)۔۔۔ دور حاضر میں نوجوان مسلم کی ذمہ داری


(۶)۔۔۔ معاصر کتابوں اور تاریخ کی روشنی میں بابری مسجد کا سانحہ۔


ان اردو کتابوں کے علاوہ ڈاکٹر مقتدیٰ حسن ازہری نے متعدد عربی کتابوں کو اردو میں منتقل کیا، ان کتابوں میں مندرجہ ذیل کتابوں کو خاص اہمیت حاصل ہے:


(۱)۔۔۔ اقتضاء الصراط المستقیم: یہ شیخ الاسلام امام ابن تیمیہ کی کتاب ہے، جس کا ڈاکٹر صاحب نے اردوزبان میں ترجمہ کیا۔


(۲)۔۔۔ مختصر زاد المعاد: یہ شیخ محمد بن عبدالوہاب نجدی کی تصنیف ہے۔


(۳)۔۔۔ اصلاح المساجد: یہ شیخ جمال الدین قاسمی کی تالیف ہے۔


(۴)۔۔۔ فتاویٰ شیخ الاسلام امام ابن تیمیہ کا اردو میں اختصار۔


ان کے علاوہ متعدد اہم اردو کتابوں کا عربی میں ترجمہ کیا۔ ان کتابوں میں بعض کتابیں یہ ہیں:


(۱)۔۔۔ قرۃ العینین فی تفضیل الشیخین : یہ حضرت شاہ ولی اللہ محدث دہلوی کی فارسی تصنیف ہے، جس کا ڈاکٹر صاحب نے عربی زبان میں ترجمہ کیا۔


(۲)۔۔۔ رحمت للعالمین: یہ علامہ قاضی محمد سلیمان سلمان منصور پوری کی نبی ﷺ کی سیرتِ مقدسہ کے موضوع پر اردو زبان میں تین جلدوں پر مشتمل کتاب ہے، جسے بے حد شہرت اور قبولیت حاصل ہوئی۔ ڈاکٹر صاحب نے اس کا عربی میں ترجمہ کیا۔


(۳)۔۔۔ تحریک آزادئ فکر اور شاہ ولی اللہ کی تجدیدی مساعی: یہ حضرت مولانا محمد اسماعیل سلفی مرحوم کی اردو تصنیف ہے۔ ڈاکٹر صاحب نے ’’حرکۃ الانطلاق الفکری وجھود الشاہ ولی اللہ فی التجدید‘‘کے نام سے اس کا عربی میں ترجمہ کیا۔


(۴)۔۔۔ حجیت حدیث: یہ بھی حضرت مولانا محمد اسماعیل سلفی کی تصنیف ہے، جسے ڈاکٹر صاحب ممدوح نے عربی کے قالب میں ڈھالا۔ اس کتاب کے چار باب ہیں:


باب اول: حدیث کی تشریعی اہمیت


باب دوم: جماعت اسلامی کا نظریۂ حدیث


باب سوم: سنت، قرآن کے آئینے میں


باب چہارم: حجیت حدیث نبیﷺ کی سیرت کی روشنی میں


اب ڈاکٹر صاحب کے تلامذہ کی طرف آتے ہیں۔


ڈاکٹر صاحب ممدوح کی تدریس کا سلسلہ ان کے جامعہ ازہر میں داخلے سے قبل سے چلتا ہے۔ اپنے وطن کے مدارس سے فارغ ہونے کے بعد ڈاکٹر صاحب ۱۹۶۰ء ؁سے ۱۹۶۲ء ؁ تک جامعہ اسلامیہ(فیض عام) مؤناتھ بھنجن کی مسند درس پر دوسال متمکن رہے۔


علی گڑھ مسلم یونیورسٹی میں (جب پی ایچ ڈی کی تیاری کررہے تھے) دوسال وہاں عربی ادب کا مضمون پڑھایا۔


اس کے بعد ۱۹۶۸ء ؁سے اب تک مسلسل جامعہ سلفیہ (بنارس) میں طلباء کو پڑھارہے ہیں۔ اس اثنا میں ان سے بے شمار طلباء نے کسب علم کیا۔ صحیح معنوں میں ان کا مقام استاذ الاساتذہ کا ہے۔ ان کے تلامذہ میں بہت سے حضرات اپنے ملک ہندوستان اور ہندوستان سے باہر (پورپ،امریکہ، افریقہ اور عرب کے) مختلف ممالک میں خدمات انجام دے رہے ہیں۔ان میں بعض درس وتدریس میں مشغول ہیں،بعض نے تصنیف وتالیف کا سلسلہ شروع کررکھا ہے،بعض تقریر وخطابت میں سرگرم عمل ہیں، بعض افتا اور تحقیق میں مصروف ہیں۔ان کے تلامذہ کی وسیع فہرست میں مولانا صلاح الدین مقبول احمد بھی شامل ہیں جو کویت میں اقامت گزیں ہیں اور وہاں تصنیف و تحقیق اور تحریر و خطابت کے فرائض انجام دے رہے ہیں۔ مولانا صلاح الدین کو اللہ تعالیٰ نے بہت سی صلاحیتوں سے نوازا ہے۔


مرکز جمعیت اہل حدیث ہند کے ناظم اعلیٰ اور مجلہ ترجمان دہلی کے مدیر اعلیٰ مولانا اصغرعلی امام مہدی کا شمار بھی ڈاکٹر صاحب کے شاگردوں میں ہوتا ہے۔


ڈاکٹر مقتدیٰ حسن ازہری نہایت فعال اور اسلام کے سرگرم عمل مبلغ ہیں۔ اپنے ملک میں تو وہ اسلام کی خدمت کرہی رہے ہیں انہوں نے ملک کے باہر بھی کئی مرتبہ اپنے ملک کے نمائندے کے طور پر مختلف اسلامی کانفرنسوں میں شرکت کی۔


علاوہ ازیں ڈاکٹر صاحب کئی علمی مجلسوں اور متعدد ادبی و ثقافتی اداروں کے رکن ہیں۔ ان میں سے بعض یہ ہیں:


*علی گڑھ مسلم یونیورسٹی کی مجلس منتظمہ اور مشاورتی کونسل


*ہندوستان کی اسلامی پرسنل لا کمیٹی


*مرکزی جمعیت اہل حدیث ہند کی مجلس عاملہ


*رابطہ ادب اسلامی ہند


*ہندوستان کی اسلامی تعلیمات کی نگہداشت کی کمیٹی


*جامعہ محمدیہ ممبئی کی تعلیمی کمیٹی


*ادارۃ البحوث الاسلامیہ جامعہ سلفیہ کے نگراں


ڈاکٹر صاحب اسلامی تعلیمات کے ان تھک داعی ہیں اللہ تعالیٰ نے ان کو گوناگوں اوصاف سے بہرہ مند کیا ہے۔ وہ بے حد محنت اور اخلاص سے حالات کی روشنی میں کام کررہے ہیں۔ اسلامی تعلیمات کے فروغ و ذیوغ کا وہ خوب تجربہ رکھتے ہیں اور اس معاملے میں اپنے ہم عصروں سے آگے نظر آتے ہیں۔ انہوں نے اپنی زندگی دین کی خدمت کے لئے وقف کردی ہے۔ وہ بہ یک وقت مصنف بھی ہیں، مترجم بھی ہیں، مدرس بھی ہیں، مقرر بھی ہیں، منتظم بھی ہیں۔ اللہ تعالیٰ ان کی زندگی دراز فرمائے اور انہیں ہر میدان عمل میں کامیابی سے نوازے۔


ڈاکٹر مقتدیٰ حسن ازہری کے بارے میں یہ مختصر سی معلومات مولانا صلاح الدین مقبول احمد(کویت) کے ایک علمی مضمون کا ترجمہ ہے جوانہوں نے ڈاکٹر صاحب کی کتاب ’’حجۃ الحدیث النبوی‘‘ پر لکھا ہے۔ یہ کتاب حضرت مولانا محمد اسماعیل سلفی کی اردو تصنیف ’’حجیت حدیث‘‘ کا عربی ترجمہ ہے۔ اگر اس سے زیادہ معلومات حاصل ہوجائیں تو ان شاء اللہ بشرطِ زندگی کسی دوسری کتاب میںآجائیں گی۔مثلا ان کے طالب علمی کے زمانے کے اہم واقعات، بنارس اور کسی دوسری جگہ پیش آنے والے واقعات، قیام مصر کے زمانے کی کوئی خاص بات۔۔۔ اس قسم کی باتیں اردو میں دستیاب ہوجائیں تو زیادہ مناسب ہوگا۔ کتابوں کے نام اردو ہی میں آنے چاہئیں، ان کا عربی ترجمہ سمجھنے میں بعض اوقات دقت پیش آتی ہے۔ اسی طرح کمیٹیوں اور اداروں کے نام بھی اردومیں لکھے جائیں جو کہ ان کے اصل نام ہیں۔ ان کے عربی ترجمے کو صحیح طور سے اردو میں منتقل کرنا ایک مسئلہ بن جاتا ہے۔


مولانا صلاح الدین مقبول احمد کے مضمون کاترجمہ قارئین کے مطالعہ میں آیا۔ اب اپنے متعلق خود ڈاکٹر مقتدیٰ حسن ازہریؔ کے چند ارشادات ملاحظہ فرمائیے۔ ڈاکٹر صاحب نے مولانا محمد اسماعیل سلفی کی کتاب حجیت حدیث (حجیۃ الحدیث النبوی) پر ’’کلمۃ المترجم‘‘ کے عنوان سے جو سطور عربی میں تحریر فرمائی ہیں، ان کا ترجمہ جناب ابوبکر ظفر (دارالدعوۃ السلفیہ شیش محل روڈ،لاہور) نے کیا۔ یہ ترجمہ ان کے شکریہ کے ساتھ ذیل میں درج کیا جارہا ہے۔


جامعہ سلفیہ بنارس میں تدریس اور عربی مجلہ ’’صوت الجامعہ‘‘ کی ادارتی ذمہ داری کے زمانے کاذکر ہے کہ میں نے بہ توفیق الٰہی مولانا محمد اسماعیل سلفی رحمہ اللہ کی چند کتب کا عربی ترجمہ کیا تھا، ان میں پہلی کتاب ’’حرکۃ الانطلاق الفکری وجہود الشاہ ولی اللہ فی التجدید‘‘ ہے، جس کا اردو نام ’’تحریک آزادئ فکر اور شاہ ولی اللہ کی تجدیدی مساعی‘‘ ہے۔


اس ترجمے کی ابتداء بظاہر معمولی لیکن اہم اور مناسب واقعہ سے ہوئی۔ یہ واقعہ ہمیشہ میرے سامنے رہا ہے:


ایک روز مدیر الجامعہ شیخ عبدالوحید عبدالحق سلفی نے مذکورہ کتاب کا اولین ایڈیشن مجھے دیا، میں نے اسے باربار پڑھایہ کتاب مجھے بہت پسند آئی۔ پھر کچھ احباب و رفقاء سے مشورہ کرکے اس کا عربی ترجمہ شروع کردیا گیا جو اس زمانے میں ’’صوت الجامعہ‘‘ میں بالاقساط شائع ہوا اور قارئین نے اس کی تحسین کی۔


ترجمے کی تکمیل پر میری درخواست کے مطابق مولانا عبیداللہ رحمانی نے اس پر نہایت فاضلانہ مقدمہ لکھا اور مولانا محمد اسماعیل سلفی رحمہ اللہ کے حالات زندگی کے بعض اہم پہلوؤں پر روشنی ڈالنے کا حکم فرمایا۔ تعمیل حکم کے بعد یہ ایڈیشن ۱۳۶۷ھ ؁میں شائع ہوا۔


اردو کے دوسرے ایڈیشن میں اضافوں کی وجہ سے ہم نے عربی میں بھی اضافہ کیا اور ڈاکٹرعبدالرحمن فریوائی نے اس دوران مراجعت کرنے میں مجھ سے تعاون فرمایا۔ اردو کی طرح عربی ایڈیشن نے بھی قارئین کرام میں قبول عام حاصل کیا۔


سلفی دعوت اور تحریک وتاریخ جیسے اہم موضوع کو دیکھنے اورپڑھنے والے محققین اس کتاب سے بھرپور استفادہ کرتے ہیں۔ مذکورہ کتاب کی اتنی مقبولیت دیکھ کر مجھے یہ شوق پیدا ہوا کہ مولانا سلفی رحمہ اللہ کی بقیہ تصانیف بھی عربی میں ترجمہ کرکے شائع کی جائیں تاکہ برصغیر میں جماعت اہل حدیث کی تگ وتاز سے اہل عرب بھی آگاہ ہوں اور جو کوششیں اس جماعت نے سنت کے پھیلاؤ اور اس کے دفاع میں کی ہیں نیز بدعات اور شرک کے خاتمے کے لئے جو وسائل اختیار کئے ہیں، ان کا عربی دان لوگوں کو پتہ چلے۔


۱۴۰۱ھ ؁ میں مولانا سلفی رحمہ اللہ کے چار مضامین پر مشتمل ایک کتاب ’’حجیت حدیث‘‘ کے نام سے منظر عام پر آئی، یہ کتاب بھی بہت مقبول ہوئی، بالخصوص محدثین کا منہج واضح کرنے میں اس کا کردار بہت اہم ہے۔


اس مجموعے کا ایک مقالہ جماعت اسلامی کا نظریہ حدیث ہے۔ چونکہ اہل حدیث کا نظریہ اس سے مختلف ہے اس لئے مولانا صلاح الدین مقبول احمد نے اس مقالے کا عربی ترجمہ کرکے کویت سے کتابی صورت میں شائع کیا۔ میں نے پوری کتاب کا ترجمہ کرتے وقت مندرجہ بالا مقالے کے علاوہ باقی مقالات کا ترجمہ کیا۔ نیز کچھ احباب کے مشورے سے اس موضوع سے متعلق دوسرے مضامین کا ترجمہ کرکے اس کتاب میں شامل کردیا تاکہ اہل عرب مولانا سلفی رحمہ اللہ کی مساعی جمیلہ سے پوری طرح آگاہی حاصل کرسکیں۔


ترجمے کا یہ کام تقریباً پندرہ سال پہلے ہی مکمل ہوچکا تھا لیکن نظر ثانی کے انتظار میں آج تک التوا کا شکار رہا۔ اب اللہ کی توفیق سے نظر ثانی کا کام مکمل کرکے، عبارتوں کا اصل ماخذ سے موازنہ کرکے اور تسامحات کی درستی کے بعد اسے شائع کیا جارہا ہے۔


علاوہ ازیں بعض شخصیات اور قابل وضاحت عبارتوں پر حواشی بھی لکھے ہیں، جنھیں آئندہ اشاعت کے لئے محفوظ کر لیا گیا ہے۔ اس اشاعت میں حصہ لینے والے تمام حضرات کا شکریہ ادا کرتا ہوں۔


اللہ تعالیٰ سب کو جزائے خیر عطا فرمائے، آمین۔

ملی ترقی کے تقاضے--
--ڈاکٹر حافظ مقتدیٰ حسن ازہری
اکیسویں صدی کے حوالہ سے ایک سوال مسلمانوں کی پسماندگی سے متعلق اٹھایا جارہا ہے،یہ پہلی مرتبہ نہیں ہورہا ہے، اس سے پہلے بھی ’’اسباب زوال امت‘‘ کے عنوان سے یہ مسئلہ اٹھایا گیا ہے،اہل علم نے مقالے اور کتابیں بھی لکھی ہیں، اگر غورکیا جائے تو اس طرح کے سوال کو اٹھانا اور اس طرح کی فکر مندی رکھنا اچھی علامت ہے۔ کویت کے ہفت روزہ المجتمع میں اسی موضوع پر ایک مضمون شائع ہواہے جس کا عنوان چبھتا ہوا ہے، کاش اس چبھن کو عالم اسلام کا ہر فرد اور ہر جماعت محسوس کرے! عنوان کچھ اس طرح ہے: ’’اکیسویں صدی کی ایجادات ۔۔۔ہم فہرست میں سب سے نیچے کیوں؟‘‘


یقیناًنتازع للبقاء کے دور میں مادی و روحانی ہر طرح کی ترقی ضروری ہے اور میدان میں جتنی اقوام موجود ہیں ان کے مقابلہ میں امت مسلمہ کو برتریاکم از کم مساوی درجہ میں ہونا چاہئے، اگر امت دیگر اقوام کے مقابلہ میں ’’مجبور ومحتاج‘‘ حیثیت رکھتی ہو تو اسے امر بالمعروف و نہی عن المنکر کا فریضہ انجام دینے میں دشواری پیش آئے گی، جو اقوام خود کو ’’برتر‘‘ تصور کرتی ہیں وہ ’’کمتر‘‘ قوم کی بات پر توجہ نہ دیں گی۔ لیکن اس حساس ونازک نقطہ پر غور کرتے ہوئے اس مقصد تخلیق کو سامنے رکھنا بھی ضروری ہے جس کا ذکر سورہ ذاریات کی ۵۶نمبر کی آیت میں ہے، روحانی و مادی ترقی کے مابین ہمیں توازن پیدا کرنا ضروری ہے، صرف ایک پہلو پر توجہ دے کر دوسرے پہلو کو نظر انداز کردینا ہمارے ملی وتہذیبی وجود کے لئے خطرہ ہے، جو اہل علم اصلاح و ترقی کی گفتگو میں صرف کسی ایک پہلو پر توجہ دیتے ہیں اور دوسرے کو دانستہ یا نادانستہ نظر انداز کردیتے ہیں ان کے ذریعہ امت کی ترقی کا پروگرام تکمیل پذیر نہیں ہوسکتا، میدان میں اگر دوسری قومیں موجود ہوں تو یہ ہماری آزمائش ہے جس سے سرخروئی کے ساتھ عہد بر آ ہونا ہمارا فرض ہے۔


اقتصادی لحاظ سے دیکھا جائے تو جو ملک یا کمپنیاں ایجادات کے میدان میں آگے ہیں ان کی اقتصادی حالت بھی مضبوط ہے، دوسروں کی جیب سے پیسے نکل کر انہیں کے پاس جاتے ہیں، صنعتی میدان کی ترقی کو اسی لئے اہمیت دی جارہی ہے، نئی مصنوعات کی وجہ سے صارفین کی ضرورت بھی بدل جاتی ہے اور ہر نئی چیز انہیں اپنی طرف مائل کرتی ہے۔


جس مضمون کی جانب اشارہ گزرا اس میں ذکر ہے کہ آج دنیا میں ۷ء۵ ملین ایجادات مرحلۂ تنفیذ میں داخل ہیں، سوال یہ پیدا ہوتا ہے کہ اس میں ہمارا حصہ کس قدر ہے اور ہم کیوں پیچھے ہیں؟


مسلم ممالک کے پاس دولت ہے اور وہ دولت خرچ بھی ہوتی ہے، لیکن حساب اس بات کا لگانا ہے کہ ان کی دولت کا کتنا حصہ سائنس و ٹکنالوجی سے متعلق تعلیم وتحقیق پر خرچ ہوتا ہے اور کتنا حصہ اسلحہ ،ادویہ اور دیگر سامانوں کی درآمد میں خرچ ہوتا ہے۔


ادارہ اقوام متحدہ کی ماتحت تنظیم (Wipo)دنیا کی ایجادات پر نظر رکھتی ہے، اس نے رپورٹ میں کہا ہے کہ گزشتہ برس دنیا نے سولہ لاکھ ایجادات کو پیش کیا لیکن صرف چھ لاکھ کو منظوری حاصل ہوئی، سرٹیفیکٹ کا مطالبہ کرنے والے ممالک کو دیکھا جائے تو جاپان سرفہرست ہے، پھر امریکہ کا درجہ اور ان دونوں ملکوں کے بعد چین ، کوریا اور یورپ کے نام آتے ہیں اور ان پانچوں ملکوں کو دنیا کی ایجادات سے متعلق مطالبہ کی مجموعی تعداد ۷۷؍فیصد کا تناسب حاصل ہے، ۷۴؍فیصد ایجادات کو سرٹیفیکٹ سے نوازا گیا ہے، لیکن ان میں کوئی عرب یا مسلم ملک نہیں۔


اس سلسلہ میں چین دوسرے ملکوں سے آگے نظر آتا ہے، پیٹنٹ کے مطالبہ میں عالمی سطح پر اب اس کا نمبر جاپان اور امریکہ کے بعد تیسرا ہے، وہ اس سلسلہ میں کوریا، روس اور یورپ ہر ایک سے آگے بڑھنا چاہتا ہے۔


سائنس و ٹکنالوجی کے میدان میں بجٹ پر نظر ڈالی جائے تو اسرائیل پہلے نمبر پر آتا ہے، وہ سائنس سے متعلق ریسرچ میں ۹۳؍فیصد یعنی اپنی قومی آمدنی کا تقریباً پانچ فیصد خرچ کرتا ہے، مصر اس سلسلہ میں اسرائیل سے پچیس گنا پیچھے ہے!


ترقی یافتہ اور ترقی پذیر ملکوں کے مابین تفاوت زیادہ ہونے کے سبب ایک مصری عالم کہتے ہیں کہ: صلاحیت کے لحاظ سے قوموں کے بیچ بہت زیادہ فرق نہیں، مغرب کی طرح مشرق میں بھی باصلاحیت لوگ موجود ہیں، فرق یہ ہے کہ یورپ و امریکہ میں جمہور کی قیادت ہوشمندوں اور صلاحیت والوں کے ہاتھوں میں ہے۔ لیکن اس کے برخلاف مشرق کے مسلم ملکوں میں ملت کی ترقی سے بے نیاز لوگ اقتدار پر قابض ہیں، ان کے اصول میں ذاتی مفاد کو مقدم رکھنا ضروری ہے، اسی طرح ذمہ داریاں تقسیم کرتے وقت بھی بہت زیادہ خیال رکھنا ضروری ہے، صلاحیت کی بنیاد پر ذمہ داری دی جائے اور اس سلسلہ میں کسی اور چیز کو پیش نظر نہ رکھا جائے۔


ایک عرصہ تک مسلم ممالک میں وسائل کی کمی کا شکوہ کیا جاتاتھا، لیکن مختلف تحقیقات کے نتیجہ میں اب ’’بندۂ مومن کی بے زری‘‘ کا حوالہ نہیں دیا جاتا۔ لوگوں کا معیار زندگی دیکھ کر بھی کوئی تصدیق نہ کرے گا کہ مسلم ممالک میں عوام غربت کا شکار ہیں، البتہ یہ صحیح ہے کہ ترقی یافتہ ممالک میں عوام کا حال اکثر مسلم ممالک کے حال سے بہتر ہے۔ دولت کی صحیح تقسیم اور تعمیر مقاصد میں اس کے استعمال کے بعد ایک مسئلہ بحث و تحقیق کی آزادی کا ہے، جو لوگ علم وتحقیق کے جوہر سے آراستہ ہیں ان کے لئے پر امن ماحول اور باوقار فضا کی یقین دہانی ہونی چاہئے اور ان کے تحقیقی منصوبوں کے لئے جس نوعیت کے وسائل کی ضرورت ہو انہیں ان کی مرضی کے مطابق فراہم ہونا چاہئے۔


اس وقت عالمی تجارت کی حوصلہ افزائی کا جو انداز ہے اس میں کمزور طبقہ کے لئے زیادہ فائدہ نہیں، بلکہ عام حالات میں وہ محروم رہتا ہے، اسی طرح محنت کش طبقہ بھی درمیانی اور اعلیٰ سطح کے تاجروں کے مقابلہ میں پامالی کا شکار رہتا 58ہے۔ اسلام نے جو مالیاتی نظام ترتیب دیا ہے اور جس طرح سماجی تعاون و تکافل کی تعلیم دی ہے اس کو بھی معاشرہ میں متعارف کرانا ضروری ہے، افراد کی خوشحالی و ترقی یقیناًمعاشرہ کی ترقی پر منتج ہوگی۔


ترقی کے لئے ملت کی جد وجہد کی بات آئی تونومبر ۱۹۸۸ء ؁ کی ایک خبر سامنے لانا ضروری ہے، اگر مسلم ممالک اس چیز کو اسی طرح اپنے پروگرام کا ضروری حصہ بنالیں تو جو خلا ہوگیا ہے اس کا پر ہونا مشکل نہ رہے گا۔


خبر کا عنوان یوں ہے:


سعودی ڈاکٹر کو امریکہ میں انعام۔


اور خبر کے مضمون میں کہا گیا ہے کہ :


سعودی عرب کے دماغی امراض کے ماہر ڈاکٹر نفیس الرضوان کو امریکہ میں دماغی امراض کی تحقیق میں ایک انتہائی اہم کامیابی پر بین الاقوامی انعام دیا گیاہے۔ ڈاکٹر نفیس الرضوان کو شاہ فیصل اسپیشلسٹ اسپتال نے اعلیٰ تعلیم کے لئے امریکہ بھیجا تھا، انہوں نے امریکہ میں اپنی اعلیٰ تعلیم مکمل کی اور تعلیم کے دوران کئی انعامات حاصل کئے، شاہ فیصل اسپتال اور تحقیقی مرکز سعودی عرب کے ۴۶ ڈاکٹروں کو اعلیٰ تعلیم کے لئے امریکہ ، کنیڈا اور یورپ بھیج چکا ہے۔


اس مقام پر دین اور ترقی میں اس کی تاثیر کے تعلق سے ایک مصری عالم و ادیب علامہ شیخ محمود محمد شاکر کے بعض تاثرات کو ذہن میں رکھنا مفید ہوگا تاکہ مادی ترقی کی رو میں اصل انسانی مسئلہ سے غفلت کا ارتکاب نہ ہوجائے۔ علامہ محمود شاکر رحمہ اللہ کو سعودی عرب نے عالمی فیصل ایوارڈ سے نوازا تھا متنبی پر موصوف کی کتاب کے شروع میں جو رسالہ شائع ہوا ہے اسے ذہن میں رکھنے سے ترقی اور اس کی بنیاد کے سلسلہ میں بعض سنگین غلط فہمیوں کا ازالہ ہوسکتا ہے۔


موصوف نے ثقافت کے مسئلہ کو دین سے جوڑا ہے، کہتے ہیں کہ ثقافت کی اصل دین ہے جو فطری امر ہے، خواہ کوئی دین ہو۔ کسی خاص قوم کی بات نہیں، بلکہ زبان وثقافت کی حامل ہر قوم کے لئے اس اخلاقی اصل یعنی دین کا وجود ضروری ہے،ہمارے اسلاف نے اسی لئے دین پر توجہ مرکوز کی تھی کہ اس طرح ان کی ثقافت محفوظ رہے اور اس میں کہیں سے جھول نہ پیداہو۔


علامہ موصوف نے سولہویں صدی عیسوی کو ترقی کے عہد کا آغاز مانا ہے اور ان کی نظر میں اسلامی تہذیب کی قوت کا راز علم میں پوشیدہ ہے اور اس سے دنیا و آخرت دونوں کا علم مراد ہے۔


یورپ کے ترقی کے سلسلہ میں علامہ کا نقطۂ نظر بیحد واضح ہے، فرماتے ہیں کہ دارالسلام (اندلس اور مصر وعراق) سے علوم کا ذخیرہ یورپ پہنچا اور اقوام یورپ نے صبر و استقلال کے ساتھ ان علوم سے استفادہ کیا، مذہبی زندگی میں جو ناہمواریاں پیدا ہوگئی تھیں انہیں دور کیا، دارالسلام سے مخطوطات کے ذخیروں کو اپنے قبضہ میں کیا اور اپنی قوم کو ان سے استفادہ کی ترغیب دی اور اس طرح چشم زدن میں نہیں بلکہ بتدریج ان کی ترقی کا آغاز ہوا۔


موصوف نے ایک دلچسپ تعبیر یہ لکھی کہ اس وقت مسلم دنیا آنکھیں کھولے ہوئے سوئی ہوئی تھی اور اہل یورپ بیدار ہوچکے تھے۔ قسطنطنیہ کی فتح کے بعد مسلمانوں پر فتح کا خمار طاری تھا اور اہل یورپ عار مٹانے کے لئے عزم و ارادہ کے ساتھ سرگرم عمل تھے۔


خاکسار کو پچھلے کسی موقع پر ’’آزادی کے بعد مسلمانوں کی پیش رفت کا جائزہ‘‘کے عنوان سے اظہار خیال کی دعوت دی گئی تھی، اس کا براہ راست تعلق اسی عنوان سے ہے جس سے یہ بات شروع ہوئی ہے ، لہٰذا مناسب ہے کہ سابقہ (لیکن غیر مطبوعہ) تحریر کا وہ حصہ پیش کردیا جائے جس کا تعلق ترقی سے ہے۔ اس مضمون میں ایک حصہ تعلیم سے، دوسرا اقتصاد سے اور تیسرا سماج سے متعلق تھا، فی الحال صرف تعلیم سے متعلق حصہ پیش کیا جارہا ہے:


مختلف میدانوں میں پیش رفت ضرور ہوئی ہے، لیکن حالات کی سنگینی کے باعث شاید اس پیش رفت کی کمی کا احساس زیادہ ہے، لیکن یہ احساس چونکہ ترقی کے لئے مفید ہے اس لئے ا س کا برقرار رہنا ملی زندگی کے لئے بہتر ہے۔


ہماری ملی زندگی میں کسی بھی نوعیت کی پسماندگی کے لئے وجہ جواز فراہم کرنا مستحسن امر نہیں،لیکن تحلیل وتجزیہ کا عمل اس وقت تک مکمل نہیں مانا جائے گا جب تک کہ ہر واقعہ کے حقیقی سبب کاذکر نہ ہو۔ اس لئے مسلمانوں کی پیش رفت کا جائزہ لیتے ہوئے اس بات پر نظر ڈالنا مناسب ہوگا کہ یہ پیش رفت تسلی بخش ہے یا نہیں اور اگر نہیں تو اس کا سبب کیا ہے؟


آزادی کے بعد مسلمانوں کے حالات پر نظر ڈالی جائے تو معلوم ہوگا کہ ملک کی اس سب سے بڑی اقلیت کے سامنے معمول کے مطابق حالات میں صرف جدو جہد سے ترقی کا سوال نہیں، بلکہ ان ۶۰؍برسوں میں آگے بڑھنے کے لئے ہمیشہ اس کو غیر معمولی اور سنگین حالات کا سامنا رہا اور ان میں سب سے سنگین مسئلہ امن وامان کا ہے، اگر معتدل اور ہموار حالات میں ترقی کی بات ہوتی تو ممکن ہے کہ ملت کا حال اس سے بہتر ہوتا، لیکن یہاں صورت حال یہ ہے کہ ملت کی توجہ اور مال ودولت کا بڑا حصہ بدامنی کی نذر ہوجاتا ہے اور یکسوئی کے ساتھ کام کرنے کے بجائے اندیشوں اور مایوسیوں کے ماحول میں لوگ سہمے سہمے کام کرتے ہیں جس کا لازمی نتیجہ یہ ہے کہ زیادہ محنت ، توجہ اور دولت صرف کرنے کے باوجود حاصل کم نکلتا ہے۔


مسلمانوں کی تعلیمی حالت کا جائزہ لینے کے لئے دینی و دنیوی دونوں طرح کی تعلیم کا جائزہ لینا ہوگا، کیونکہ دونوں کے تقاضے اور مقاصد الگ الگ ہیں اور دونوں میں ملت کی پیش رفت بھی مختلف ہے۔


دینی تعلیم میں جو پیش رفت ہوئی ہے اسے مجموعی طور پر بہتر کہا جاسکتا ہے اور بالخصوص ظاہری لحاظ سے یہ پیش رفت قابل اطمینان نظر آتی ہے، کیونکہ عرب ممالک سے مسلمانوں کے تعلقات کی استواری کے بعد دینی تعلیمی اداروں کو مالی تعاون حاصل ہوا ہے، جس کے سبب ان اداروں کا دائرہ کار وسیع ہوا ہے اور عمارتوں اور مدرسین کی تنخواہو کا معیار بہتر ہوا ہے، بہت سے جدید تعلیمی ادارے قائم ہوئے ہیں اور قدیم اداروں نے اپنی حیثیت مضبوط کی ہے۔


ظاہری حیثیت سے دینی تعلیم میں پیش رفت کے تذکرہ کے بعد اس کی معنوی حیثیت پر ایک نظر ضروری ہے۔ تجربہ شاہد ہے کہ انسان باطن کے مقابلہ میں ظاہر پر توجہ کم دیتا ہے، یہ چیزیہاں بھی نظر آتی ہے، یعنی آزادی کے بعد دینی مدارس نے اپنی ظاہری حالت جس حد تک سدھاری ہے، اتنا سدھار معنوی حالت میں نہیں ہوا ہے، موجودہ دور میں جس اعلیٰ تعلیمی معیار، بالغ نظر علماء، مدلل و دل کش دینی لٹریچر اور مؤثر انداز تبلیغ کی ضرورت ہے وہ ان مدارس سے پوری ہوتی نظر نہیں آرہی ہے۔ شاہ بانو کیس کے بعد مذہبی بنیادوں پر مسلمانوں کی سماجی اصلاح کا خیال ضرور پیدا ہوا ہے، لیکن یہ خیال کمزور اور وقتی دباؤ کے اثر جیسا محسوس ہوتا ہے۔


مدارس کے تئیں یہ احساس عام ہے کہ انہوں نے دینی تعلیم کے میدان میں تعلیم و اشاعت کے جدید ذرائع سے فائدہ نہیں حاصل کیا اور تعلیمی نظام میں ایسی سبیل نہیں پیدا کی جس سے لوگوں کی دلچسپی اور توجہ میں اضافہ ہو۔ جنگ آزادی کی تاریخ میں ہمیں علماء کی بڑی تعداد نظر آتی ہے، انہوں نے پوری بصیرت و ہمت کے ساتھ سیاسی میدان میں مسلم عوام کی قیادت کی اور انہیں اسلام سے وابستہ رہتے ہوئے انگریزوں کے مقابلہ اور ملحد مغربی تہذیب سے دور رہنے کی ترغیب دی۔ تحریک شہیدین (سید احمد شہیدؒ اور شاہ اسماعیل شہیدؒ ) اور علماء صادق پور کے حالات کا مطالعہ کرنے سے نظر آتا ہے کہ مسلمانوں کی ہر نوعیت کی رہنمائی کو ان علماء نے ضروری قرار دیا تھا اور اکثر علماء اس میں عملی طور پر شریک تھے۔لیکن آزادی کے بعد علماء کا کردار اتنا مؤثر نظر نہیں آتا، مسائل تو متعدد اور ہر نوعیت کے ہیں، لیکن میدان میں مسلمانوں کی رہنمائی کے لئے علماء موجود نہیں، ان کا دائرہ کار تعلیمی میدان تک محدود ہے اور بہت محدود طور پر وہ عام دینی مسائل میں رائے دیتے ہیں، لیکن سیاست و اقتصاد سے متعلق ان کا کردار ناقابل ذکر ہے۔ اس خلاء کی وجہ سے ہماری سیاست اور اقتصاد دونوں پر غیر اسلامی رنگ چڑھ گیا ہے جو مستقبل میں برے نتائج پیدا کرے گا۔ مسلمانوں کی رہنمائی کے فرض سے علماء کی علیحدگی کے نتیجہ میں مسلمانوں کی سیاسی واقتصادی قیادت کے لئے جو لوگ میدان میں آئے وہ اپنے فرض کو پورے طور پر ادا نہیں کرپا رہے ہیں،یا کسی اور سبب سے ان کی قیادت کامیاب نہیں ہے۔


دانشوروں میں ترقی کے موضوع پر سید حامد صاحب کے خیال سے واقفیت بے محل نہ ہوگی، موصوف نے حج ہاؤس ممبئی میں اکتوبر ۲۰۰۰ء ؁ میں ’’اکیسویں صدی میں سماجی خدمات: چیلنج و ترجیحات اسلامی نقطۂ نظر میں‘‘ اپنے خیالات کا اظہار کرتے ہوئے مسلمانوں کو ۴؍خارجی اور ۲؍داخلی خطروں سے آگاہ کرتے ہوئے کہا کہ ۲۰؍ویں صدی میں دنیا کی برق رفتارترقی میں ان کا کوئی حصہ نہیں رہا اور وہ ہر طرح سے پسماندہ رہ گئے ہیں، وہ سر اٹھا کر نہیں چل پارہے ہیں۔


انہوں نے اس بات پر افسوس کا اظہار کیا کہ مسلمانوں کی تعلیمی اور معاشی زبوں حالی پر غور کرنے کے لئے ماضی میں سیمینار اور اجلاس منعقد کئے گئے لیکن اس کے بعد عملی اقدامات نہیں کئے گئے ہیں اور اس کے سبب ان اجتماعات کا کوئی فائدہ نہیں ہوسکا ہے۔


سید حامد نے فرقہ وارانہ ہم آہنگی پر زور دیتے ہوئے کہا کہ انتہا پسندی کا جواب عداوت سے نہیں دینا چاہئے کیونکہ اکثر دیکھا گیا ہے کہ بہتر سلوک سے دل بدل جاتے ہیں اور خدمت خلق کا جذبہ سبھی کے لئے ہونا چاہئے، اس میں تفریق نہ کی جائے۔


انہوں نے معاشرے میں فحاشی اور عریانیت کے اضافہ پر تشویش کا اظہار کرتے ہوئے کہا کہ یہ ایسے فتنے ہیں جن سے ہمارے نوجوانوں کو دور رکھنا ہوگا، ان فتنوں کے علاوہ ۲؍ایسے خطرے ہیں جو مسلم معاشرے کے داخلی خطرات میں شمار ہوتے ہیں۔


سید حامد نے داخلی خطرات میں مسلکی اختلافات کو سب سے زیادہ خطرناک قرار دیتے ہوئے کہا کہ اس طرح کے اختلافات شرمناک ہیں، اسلام میں ان کے لئے کوئی جگہ نہیں ہے، اس سے زیادہ افسوس ناک بات یہ ہے کہ اختلافات ممبئی، حیدرآباد،دہلی وغیرہ سے نکل کر برمنگھم اور شکاگو تک پہنچ گئے، اس کا حل یہ ہے کہ ہم ایک دوسرے کے مسلک کا احترام کریں اور اتحاد کا مظاہرہ کریں، انہوں نے شمالی ہندمیں برادری واد کے بڑھتے ہوئے رجحانات سے بھی آگاہ کرتے ہوئے کہا کہ اس کا فائدہ اہل سیاست اٹھانے کی کوشش کررہے ہیں اور انہیں کامیاب ہونے نہیں دینا چاہئے۔


جامعہ ہمدرد کے چانسلر نے کہا کہ رائے عامہ نہ ہونے کی سزا بھی مسلمانوں کو بھگتنا پڑ رہی ہے، اس کی وجہ سے ارباب اقتدار پر مسلمانوں کی بات کا وزن نہیں پڑتا، اپنی بات منوانے کے لئے رائے عامہ بنانا نہایت ضروری ہے، اس کے لئے ایک عرصہ قبل مجلس مشاورت کی بنیاد ڈالی گئی مگر اختلافات نے اسے دو ٹکڑوں میں تقسیم کردیا ہے۔


انہوں نے اچھی اور مؤثر قیادت کے فقدان کا ایک سبب یہ بھی بتایا کہ مسلمانوں نے قیادت کو ہمیشہ شک وشبہ کی نظر سے دیکھا ہے، اچھی قیادت کے لئے انہیں اپنے قائدپر اعتماد کرنا ہوگا اور اس کی نیت پر شبہ نہ کیا جانا چاہئے، اس کے علاوہ ہمیں ادارے چلانے کا شعور نہیں ہے، جو بدنظمی کے ساتھ ساتھ بھائی بھتیجہ واد کا شکار ہیں۔ سید حامد نے تعلیم سے کنارہ کشی کو مسلمانوں کی پسماندگی کا سبب بتاتے ہوئے کہا کہ ایک انگریز مورخ کا کہنا ہے کہ ۸ویں صدی سے ۱۳ویں صدی تک سائنسی ایجاد مسلمانوں نے کی ہیں، آج نوبدھسٹ اور مسلمان سب سے زیادہ پسماندہ ہیں، اس لئے اب ہمیں ناخواندگی دور کرنے کے لئے اقدامات کرنا ہوں گے، اس میدان میں خصوصی طور پر لڑکیوں کی تعلیم پر توجہ دینا چاہئے، تعلیم کے سلسلے میں جدید تعلیم پر توجہ نہیں دی گئی تو مسلمان کافی پچھڑ جائیں گے۔


حفظان صحت اور اصلاح معاشرہ کی ضرورت پر زور دیتے ہوئے سید حامد نے کہا کہ حکومت کی جانب سے اس تعلق سے چلائی جانے والی مہم میں بڑھ چڑھ کر حصہ لینا چاہئے۔


انہوں نے کہا کہ ہم کو اس پوزیشن میں ہونا چاہئے کہ اپنی بات مؤثر انداز میں پیش کر سکیں، اس کے لئے وطن کے ساتھ تعلقات کو استوار کرنا ہوا، کیونکہ یہ عام بات ہے کہ کوئی کسی مذہب کی معلومات کے لئے اس کا مطالعہ نہیں کرتا ہے، بلکہ اس کے ماننے والوں کی عادات اور اخلاق پر نظر رکھتا ہے۔


ان سطور کے اخیر میں عرض کرنا ضروری ہے کہ ملی ترقی مسلسل عمل واستقلال و پامردی اور امید و حوصلہ کا متقاضی ہے، اگر ملت ان اوصاف کو اپنے اندر پیداکرلے اور نیت کی درستگی کے ساتھ کام شروع کردے تو ناکامی کی کوئی وجہ نہیں، اللہ تعالیٰ ہماری مدد فرمائے۔